भारदह । सप्तरीको हनुमाननगर कंकालिनी नगरपालिकाले कृषकका लागि मास्टर विद्युतीय मिटर जडान गरेको छ ।
नगरपालिको वडा नम्बर १ भारदह तथा वडा नम्बर ४ गंगापुरमा मास्टर विद्युतीय मिटर जडान गरेको हो । यो मिटरको जनमत पार्टीका अध्यक्ष डा. सिके राउतले शनिबार स्वीच थिचेर उद्घाटन गरेका छन् ।
यी दुबै ठाउँमा १०० केभिएको ट्रान्सफर्मर जडान गरिएको छ । र, त्यहाँ एउटा मास्टर विद्युतीय मिटर राखिएको नगर प्रमुख बिरेन्द्र माझीले जानकारी दिए ।
एउटा ट्रान्सफर्मर मार्फत् डेढ् सय पानी तान्ने मोटर चलाउन सकिनेछ । सबै मोटर चलाए वापत तिर्नुपर्ने महसुल नगरपालिकाले तिर्नेछ । ‘प्रत्येक महिना यी विद्युतिय मास्टर मिटरको उठ्ने महसुलको बिल विद्युत प्राधिकरणले नगरपालिकालाई पठाउँछ । र, नगरपालिकाले उक्त महसुल तिर्नेछ’ नगर प्रमुख माझीले भने ।
वडा नम्बर १ भारदहमा केरा खेती अत्यधिक हुने गर्दछ । यस्तै वडा नम्बर ४ गंगापुरमा केराका साथै अन्य उब्जनी समेत हुने गर्दछ ।
नगर प्रमुख माझीका अनुसार नगरपालिकाका पाँच ठाउँमा समेत १०० केभिएको ट्रान्सर्फमर जडान गर्दै मास्टर विद्युतीय मिटर राखिएको जानकारी दिए । यी ठाउँमा पनि चाँडै संचालन गर्ने योजना रहेको उनले बताए ।
यसअघि किसानले आफैं विद्युतिय मिटर लिने गरेका थिए । तर, जग्गाको लालपूर्जा नभएका किसान भने यो मिटर लिनबाट बंचित रहँदै आएका थिए । ‘अब लालपूर्जा हुने र नहुने किसानले समेत आफ्नो खेतमा विद्युत उपभोग गर्न सक्छन्’ प्रमुख माझीले भने, ‘आफूनिर्वाचित भएपछि गरेको पहिलो निर्णयलाई मूर्त रुप दिन थालेको छु ।’
स्थानीय किसान नगरपालिकाको यो कार्यबाट खुशी महसुस गरेका छन् । उनीहरुले अब आफ्नो उत्पादकत्व बढ्ने विश्वास गरेका छन् ।
