राजविराज । गृहमन्त्री रमेश लेखकले अहिलेको प्रधानमन्त्रीलाई प्रत्येक ३ महिनामा विश्वासको मत लिन संसदमा जानुनपर्ने स्थिति बनेको बताएका छन् ।
नेपाली कांग्रेस, सप्तरी क्षेत्र नम्बर २ द्वारा बुधबार राति राजविराजमा आयोजित अगुवा कार्यकर्ता अभिमुखिकरणलाई सम्बाेधन गर्दै उनले यस्तो बताएका हुन् ।
एमालेसंग सरकार बनाएको १० महिनामा देश स्थिरतातर्फ उन्मुख भएको नेपाली कांग्रेसका नेता समेत रहेका उनले बताए ।
‘एमालेसँग सरकार बनेको १० महिनामा धेरै काम गरेको छु भन्दिन’ उनले भने, ‘तर १० महिनाभन्दा अघिको समयको अवस्थामा परिवर्तन भएको छ । त्यसअघी प्रधानमन्त्रीले ३ महिनामा विश्वासको मत लिन संसदमा जानूपर्थ्यो । अहिले त्यसताे स्थिति छैन् ।’
उनले सरकार बनेको १० महिनामा आर्थिक स्थितिमा, कानुन निर्माणमा देश अघि बढेको बताए । उनले याे अवधिमा संघीयतालाई बलियो बनाउन धेरै विधेयक बनाइएको जानकारी समेत गराए ।
केही मानिस र समुहले निरासा बाडेर निरासाको खेती र व्यापार गरिरहेको उल्लेख गर्दै उनलेे काङ्ग्रेसले कहिले पनि निराशाको कुरा नगर्ने बताए । ‘काङ्ग्रेस नै निराश भए देश कसले हेर्छ ?’ उनले प्रश्न गरे ।
आफू भौतिक पुर्वाधार मन्त्री हुदा तराईमा थुप्रै सडक, पुलको काम गरेको बताउँदै उनलेे काङ्ग्रेसका नेताहरु विकासप्रति प्रतिबद्ध हुने गरेको बताए । ‘हामी भोलि पनि गर्नुपर्ने काम गर्छौ’ उनले भने ।
नेपाली कांग्रेसका केन्द्रीय सदस्य एवं प्रतिनिधि सभा सदस्य दिनेश कुमार यादवले नेपाली कांग्रेसकाे उपस्थिति मधेश प्रदेशमा बलियो बनाउनुपर्नेमा जोड दिए ।
उनले गृहमन्त्री रमेश लेखककाे प्रसंशा गरे । लेखक भौतिक पुर्वाधार मन्त्री हुँदा पातो कठौना सडक, शम्भुनाथ बनैनिया सडक र हुलाकी सडक बनाउन ठुलो योगदान पुर्याएको बताए ।
काेशी प्रदेशका प्रदेश सभा सदस्य एवं विराटनगरका पुर्व प्रमुख भीम पराजुलीले कांग्रेस एमाले गठबन्धनको सरकारले सुशासन, आर्थिक समृद्धि र संविधान संशोधन गर्ने विश्वास व्यक्त गरे ।
नेपाली कांग्रेस मधेश प्रदेशका सभापति कृष्णा यादवले पार्टीलाई बलियो बनाउनुपर्ने बताए ।
कार्यक्रममा तिलाठी काेइलाडी गाउँपालिकाका पूर्व वडा अध्यक्ष मनाेज कुमार चाैधरीकाे नेतृत्वमा केशरीकुमार सिंह बिनाेद झा, अनिल मण्डल, जयनारायण राम, विजयाकुमारी मण्डलसहित ४६ जना नेपाली कांग्रेसमा प्रवेश गरे ।
यस्तै, विद्यार्थी नेताहरु मोहन साह, पृयान्सु यादव, निल सहनी, भोला मन्ड्ल, अनिल शर्मा, तेजनारायण रजक, नन्दुकुमार मण्डलसहितका समेत पार्टीमा प्रवेश गरेका छन् ।
नेपाली कांग्रेस सप्तरी क्षेत्र नम्बर २ का सभापति महानन्द यादवकाे अध्यक्षतामा कार्यक्रमको आयोजना भएको थियो ।
