राजविराज । राजविराजस्थित मधेश कृषि विश्वविद्यालय र भारतको डा. राजेन्द्र प्रसाद केन्द्रीय कृषि विश्वविद्यालय पुसाबीच सहयोग सहकार्यका निम्ति सम्झौता भएको छ ।
कृषि शिक्षा, अनुसंधान तथा प्रसार कार्यमा संकाय, विद्यार्थी ज्ञान, अनुभव, शीप आदान प्रदान गर्न र पारस्परिक सहयोग, सहकार्य तथा समन्वय गर्न दुबै विश्वविद्यालयबीच सम्झौता भएको हो ।
मधेश कृषि विश्वविद्यालयमा सोमबार दुबै पक्षबीच समझदारी पत्रमा हस्ताक्षर भएको छ ।
मधेश कृषि विश्वविद्यालयको तर्फबाट उपकुपति डा. बैद्यनाथ महतो र राजेन्द्र प्रसाद केन्द्रीय कृषि विश्वविद्यालयको तर्फबाट रजिष्ट्रार डा मृतुञ्जय कुमार सिंहले सम्झौता पत्रमा हस्ताक्षर गरेका छन् । साक्षीमा मधेश कृषि विश्वविद्यालयका रजिष्ट्रार डा. श्रीभगवान ठाकुर तथा राजेन्द्र प्रसाद केन्द्रीय कृषि विश्वविद्यालयका शिक्षा निर्देशक डा उमाकान्त बोहराले हस्ताक्षर गरेका छन् ।
मधेश कृषि विश्वविद्यालयको सभा हलमा आयोजित उक्त हस्ताक्षर समारोहमा उप प्राध्यापक तथा कर्मचारीहरूको सहभागिता थियो ।
यो सम्झौताले विश्वविद्यालयको शैक्षिक तथा अनुसन्धान कार्यको गतिमा थप सहयोग पुग्ने मधेश कृषि विश्वविद्यालयका रजिष्ट्रार ठाकुरले विश्वास व्यक्त गरेका छन् । ‘यसवाट भौगोलिक, सामाजिक,पर्यावरणीय तथा कृषि प्रणाली मिल्दोजुल्दो भएकोले धेरै फाइदा हुनेछ’ उनले भने ।
