राजविराज । राजविराज नगरभित्रकै बाटोका कारण गुडाउन समस्या भइरहेको भन्दै सिटी रिक्सा चालकहरुले नगरपालिकाको ध्यानाकर्षण गराएका छन् ।
नगरको जताततै खाल्डो रहँदा आफूहरुलाई समस्या भएको सिटी रिक्सा चालकको भनाई छ । उनीहरुले बाटो निर्माणको माग गर्दै बुधबार नगरपालिकाको कार्यालय अगाडि सिटी थन्काएर धर्ना दिएका छन् ।
खराब बाटोका कारण सधैं कुनै न कुनै सिटी दुर्घटनामा पर्दा आफूहरुलाई आर्थिक बोझ बोक्नुपरिरहेको सिटी रिक्सा चालक रामदेव खंगले बताए ।
ऋण लिएर सिटी किनेको र दुर्घटनामा पर्दा आर्थिक बोझ बोक्न नसकेर धेरैले सिटी चलाउन नसकेको उनले बताए ।
अर्का चालक बिरेन्द्र कुमार मण्डलले हनुमान मन्दिरदेखि पडरियासम्म खाल्डैखाल्डो रहँदा ती रुटमा चलााउनै नसकिएको बताए । चलाउँदा कतिपय ठाउँमा सिटी नै पल्टिएको छ’ उनले भने, ‘रुपनी रोडसहित अन्य ठाउँमा पनि सडकमा खाल्डो हुँदा चलाउन गाह्रो भइरहेको छ ।’
अखिल नेपाल यातायात मजदूर संघका जिल्ला अध्यक्ष विजय प्रसाद देवले खराब बाटोका कारण सिटी रिक्सा चलाउनेको पेशा नै संकटमा परेको बताए ।
खाल्डोका कारण जहिल्यै पनि दुर्घटना बढिरहेकाले बाटो व्यवस्थित गर्न नगरपालिकालाई दबाव दिने उद्देश्यले सिटी थन्काएर बिरोध गरेको उनले बताए ।
ठेक्का लागिसकेको सडकको काम गराउने दायित्व नगरपालिकाको भएको उनले बताए । निर्माण कम्पनीले काम नगरे नगरपालिकाले आफैं पनि तत्काल माटो र ग्राभेल हालेर व्यवस्थित गर्नुपर्नेमा ध्यान नदिएकाले आन्दोलनमा उत्रनुपरेको उनको भनाई छ ।
खाल्डो रहेका सडकलाई व्यवस्थित नगरे आफूहरु चरणबद्ध आन्दोलनमा उत्रने सिटी रिक्सा चालकको भनाई छ ।
