राजविराज । संघीय लोकतान्त्रिक मोर्चाको जनजागरण अभियान अन्तर्गतको सभा आज राजविराजमा हुँदैछ ।
६ मधेशवादी दल सम्मिलित मोर्चाको आज दिउँसो राजविराजस्थित जिल्ला समन्वय समितिको सभाहलमा कार्यक्रमको आयोजना गरिएको छ ।
जनता समाजवादी पार्टी (जसपा) नेपाल, लोकतान्त्रिक समाजवादी पार्टी (लोसपा) नेपाल, राष्ट्रिय मुक्ति पार्टी, नागरिक उन्मुक्ति पार्टी, जनता प्रगतिशिल पार्टी र तराई मधेश लोकतान्त्रिक पार्टीबीच मोर्चा बनेको छ । मोर्चामा जनमत पार्टी रहेपनि अलग भएको छ ।
राजविराजमा राष्ट्रिय मुक्ति पार्टीको आयोजनामा कार्यक्रम हुँदैछ । कार्यक्रममा सहभागी हुन अधिकांस दलका केन्द्रीय नेताहरु राजविराज पुगिसकेका छन् ।
मोर्चाले पहिलो चरणमा राजविराजसहित देशको आठ ठाउँमा जनजागरण अभियान संचालन गर्ने तय गरेको छ । विराटनगरमा १५ गते सभा भइसकेको छ भने आज राजविराजमा र २० गते जनकपुरधाममा कार्यक्रम हुने मोर्चाका नेता गजेन्द्र मण्डलले जानकारी दिए ।
