राजविराज । मुक्त हरवाचरवा अधिकार मञ्चले सबै स्थानीय तहलाई परिचालित गरेर हरवाचरवाको यकीन तथ्याङ्क र लगत तत्काल लिने व्यवस्था गर्न माग गरेको छ ।
सोमबार राजविराजमा पत्रकार सम्मेलन गरि मञ्चले तथ्यांक र लगत लिएर अविलम्व परिचयपत्र र व्यवस्थापन सम्बन्धी प्याकेज दिन माग गरेको छ ।
मञ्चका महासचिव लागेन सदाले नेपाल सरकारद्वारा गरिएको ऐतिहासिक हरवाचरवा मुक्तिको घोषणालाई स्वामित्व लिई प्रदेशभरी लागू हुने गरी मन्त्रिपरिषदबाट तत्काल पुनःस्थापनाको काम शुरु गर्न माग गरे ।
पत्रकार सम्मेलनमा बितरण गरिएको प्रेस विज्ञप्तिमा आवास बिहीन हरेक हरवाचरवा परिवारको लागि बस्नयोग्य घरको व्यवस्था गर्न माग गर्दै यसका लागि पर्ती वा ऐलानी जमिन वा गाउँब्लकमा रहेका हरवाचरवालाई उनीहरु बसोबास गरीरहेकै स्थानमा प्रति परिवार शहरमा भए कम्तीमा एक कठ्ठा र ग्रामीण क्षेत्रमा भए २ कठ्ठा जमिन प्रदान गर्न भनिएको छ ।
हरवाचरवा परिवार बस्दै आएको थातथलोबाट बैकल्पिक व्यवस्था बिना कुनै पनि बहानामा हटाउने कार्य रोक्नुपर्ने, स्थानीय तहमा डेस्क स्थापना गरी (नागरिकता प्राप्तिमा सहजीकरण, जन्मदर्ता, जग्गा सवाल बसोवास, राहत, सीपमूलक तालिम) को व्यवस्था गर्नुपर्ने, स्थानीय तहमा श्रम निर्देशिका तयार गरी न्यूनतम् पारिश्रमिकको व्यवस्था कार्यान्वयन गर्न माग गरिएको छ ।
यस्तै, हरवा चरवा परिवारका बालबालिकाका लागि विशेष छात्रवृत्तिको व्यवस्थासहित विद्यालय बाहिर रहेका बालबालिकालाई पुनः विद्यालय फर्काउने अभियान संचालन गर्न, हरवा चरवा परिवारको आयआर्जनका लागि सीपमूलक तालिमको व्यवस्था गर्न, हरवा चरवा परिवारलाई स्थानीय सरकारले स्वास्थ्य बीमाको व्यवस्था गर्न पनि माग गरिएको छ ।
मञ्चका अध्यक्ष दशन मण्डलले यी न्यायिक मागहरु अबिलम्ब सम्बोधन गर्न सम्बन्धित निकायसँग आग्रह गरे ।
