राजविराज । चालू आर्थिक बर्षको ६ महिना बित्न लाग्दा पनि विवादको भूमरीमा परेर कुनै काम गर्न नसकेको पालिका सप्तरीको कंचनरुप बनेको छ । यो पालिकामा नगर प्रमुख र उप प्रमुखबीचको विवादले हालसम्म पनि सभा हुन सकेको छैन ।
नगर सभा हुन नसक्दा शिक्षक, स्वास्थ्यकर्मीसहित सम्पूर्ण कर्मचारी तलव, भत्ता पाउन सकेका छैनन् भने अन्य सबै कामहरु पनि अघि बढ्न नसकेको स्थिति छ ।
नगर प्रमुख ललन प्रसाद गुप्ता र उप प्रमुख मुना कुमारी पोखरेलबीचको विवाद उत्कर्षमा पुगेको छ । नेपाली कांग्रेस पार्टीबाट निर्वाचित दुबै जनाबीच शुरुदेखि नै विवाद रहँदै आएकोमा पछिल्लो पटक झनै बढेको छ । जसका कारण चालू आ.ब.को सभा हालसम्म पनि हुन सकेको छैन् ।
सभा नभएर तलव नपाउँदा शिक्षकसहितका कर्मचारी पटक–पटक आन्दोलनमा उत्रिएका छन् । तर, आश्वासनबाहेक केही पनि पाउन सकेका छैनन् ।
नगरपालिकाका प्रमुख प्रशासकीय अधिकृत सर्वजीत कुमार झाले पटक–पटक नगरसभा गराउन नगर प्रमुख र उपप्रमुखबीच आवश्यक समन्वय गर्न अधिकतम लचकताका साथ प्रयास गर्दा पनि सफलता हात नलागेको बताए । ‘समन्वय गर्ने क्रममा नगर उपप्रमुखज्यूले मान्नुभएको छैन र नगर सभाको लागि वैठकहरु गर्न खोज्दा पनि उप प्रमुखज्यूले पटक–पटक सम्मानित उच्च अदालत राजविराजमा मुद्दा दिदैं आउनुभएको छ ।’
झाले सम्मानित उच्च अदालतबाट पनि नगरकार्यपालिका बैठकमाथि समेत रोक लाग्ने गरेको बताए । यस्तो अवस्थामा नगरपालिकाका सम्पूर्ण जनप्रतिनिधीज्यूहरु मिलेर जनता र कर्मचारीहरुप्रति जिम्मेवारी वोध गर्दै एकजुट भई नगर सभा गराउने वाहेक निकासको अर्को बाटो छैन’ प्रमुख प्रशासकीय अधिकृत झाले लिखित रुपमा भनेका छन् ।
झाले शुक्रबार सार्वजनिक गरेको पत्रमा नगरपालिकाका नगर प्रमुख र कर्मचारी, शिक्षकहरुकोबीचमा तलव भत्ता सम्बन्धमा २४ मंसिरमा भएको सम्झौता वमोजिम तलव भता दिन नगर सभा वाहेक वा विनियोजन विधयेक विचाराधीन रहेको अवस्थामा वाहेक अरु कुनै पनि विकल्पबाट नमिल्ने देखिएको उल्लेख गरेका छन् । उनले भनेका छन्, ‘सञ्चित कोषबाट तलब दिंदा विभिन्न निकायबाट मौखिक सल्लाह वमोजिम अनियमित हुने देखिएकोले संचित कोषबाट तलब निकासा गर्न सकिने अवस्था छैन् ।’
उनले वैधानिक तरिकाबाट नगर सभाबाट बजेट स्विकृती पश्चात तलब निकासा गर्न पछि नहट्ने पनि बताएका छन् ।
