राजविराज । राजविराजस्थित गजेन्द्रनारायण सिंह अस्पतालमा हाई डिपेन्डेन्सी यूनिट (एचडियु) र नवजात शिशुको सघन हेरचाह गर्ने एकाई (एनआइसियू) पुनः सुचारु भएको छ ।
अस्पतालले बुधबार पूजापाठ गरी यो दुबै एकाईको पुनः शुरुवात गरेको हो । अस्पतालका प्रमुख मेडिकल सुपरिटेन्डेन्ट डा. अवधेश मिश्रसहितका चिकित्सकले पूजापाठ गरी दुबै एकाईको शुरुवात गरेका छन् ।
मेडिकल सुपरिटेन्डेन्ट डा. मिश्रले भएकै जनशक्तिले यो दुबै सेवा संचालन गरिने बताए । ‘यहाँ आएका बिरामीलाई बाहिर रेफर गर्नु नपरोस् र यहीं उपचार होस् भन्ने हेतुले यो सुवा पुनः संचालन गरेका छौं’ उनले भने, ‘यसबाट यहाँ आउने बिरामीले लाभ लिनेमा विश्वस्त छौं ।’
अस्पतालमा एचडियूको १२ वटा र एनआइसियूको ४ वटा बेड रहेको छ । एनआइसियू सेवा निःशुल्क प्रदान हुनेछ भने एचडियूमा भर्ना हुने बिरामीलाई दैनिक रु २ हजार तिर्नुपर्ने हुन्छ ।
यसअघि पनि एचिडियुको शुल्क यहीं थियो ।
कोरोनाकालमा स्थापना भएको यो दुबै युनिट माघ २०८१ बाट बन्द भएको थियो । जनशक्तिकै अभावमा बन्द भएको यो दुबै युनिटलाई अब बन्द नहुने किसिमले संचालन गरिएको मेडिकल सुपरिटेन्डेन्ट डा. मिश्रले बताए ।
कस्ता बिरामीलाई राखिन्छ एचडियूमा ?
एचडियू युनिट आइसियू र जेनरल वार्डको बीचको युनिट हो । यहाँ सिकिस्त बिरामीलाई राख्ने गरिन्छ ।
जुन बिरामीलाई लगातार मोनिटिरिंग चाहिन्छ, जुन बिरामीलाई अक्सिजन, बिपी बढाउने ड्रप्सहरु दिनुपर्ने हुन्छ त्यस्ता बिरामीलाई यहाँ राखेर उपचार गर्छौं’ चिकित्सक डा. अरुण साह बताउँछन् ।
यस्ता बिरामीलाई लगातार चेक गरिराख्नुपर्ने भएकाले एचडियूमा राखेर नियमित चेकजाँच गर्ने गरिएको उनी बताउँछन् ।
‘आयसियू माथिल्लो युनिट हो र जेनरल तल्लो युनिट हो’ उनी भन्छन्, ‘यो दुई युनिटबीचको अवस्थाका बिरामीलाई यहाँ राखेर उच्च निगरानीमा उपचार हुन्छ ।’
