राजविराज । शरदसिंह यादव नेतृत्वको जन अधिकार पार्टीले अधिकारको आन्दोलनबाट जन्मेको मधेशी दलहरु आफ्नो व्यक्तिगत अधिकार खोज्नु, परिवारवाद र आफन्तमै रमाएका कारण मधेश प्रदेशको विकास हुन नसकेको ठहर गरेको छ ।
पार्टीले मंगलबार राजविराजमा जारी गरेको घोषणा पत्रमा यस्तो आरोप लगाइएको छ । संघीयता आएपछि पहिलो पाँच बर्ष आफूलाई मधेशी भनिने दलहरुले नै सरकारको नेतृत्व गरेको र अहिले केही दिन अगाडि नेपाली कांग्रेसले नेतृत्व लिँदा दोस्रो कार्यकालको तीन बर्ष मधेशी दलले नै मधेश प्रदेशको नेतृत्व गरेपनि प्रदेशको अवस्था उस्तै रहेको घोषणा पत्रमा उल्लेख गरिएको छ । ‘यो अवधीमा प्रदेशको कुनै पनि सूचकांकमा सुधार आउन सकेको छैन्’ घोषणा पत्रमा भनिएको छ, ‘मधेश उर्वरभूमी हो । यहाँका अधिकांस बासिन्दा कृषिमा निर्भर छन् । कृषिलाई व्यवसायीकतातर्फ रुपान्तरित गर्दै अघि बढाउन सकिन्थ्यो । यो अवधीमा प्रदेशलाई नै शिक्षित बनाउन सक्नुपर्थ्यो । कुनै पनि जिल्ला हालसम्म साक्षर घोषणा हुन सकेको छैन् ।’
भौगोलिक सुगमता, उर्वर भूमी, पूर्वाधारमा सरल पहुँच लगायत श्रोत साधनले सम्पन्न भएपनि मानव विकास सूचकांक, साक्षरता दर, रोजगारीसहित शिक्षा र स्वास्थ्यमा पनि मधेशको त्यत्तिकै कमजोर स्थिति रहेको उल्लेख गरिएको छ ।
‘संघीयताको झण्डै एक दशक भएपनि प्रदेशका आन्तरिक श्रोतको दायरा विस्तार हुन नसक्नु र प्रदेशका जनताले हालसम्म सुशासनको अनुभूति गर्न नसक्नु झन दुःखको कुरा हो’ घोषणा पत्रमा अघि भनिएको छ, ‘प्रदेशमा बहुआयामिक गरिबी दर अन्य प्रदेशभन्दा उच्च छ । तथ्यांकमा हेर्ने हो भने बहुआयामिक गरिबी दर ४७ प्रतिशतको हाराहारीमा छ ।’
मधेशी दलहरु स्वार्थमै रुम्लिए
जन अधिकार पार्टीको घोषणा पत्रमा मधेश प्रदेशमा लगातार सरकारको नेतृत्व गर्ने दल र नेताको आलोचना गरिएको छ । मधेशमा बलेको आगो र दिइएको बलिदानीबाट २०६३ सालमा उदाएको तत्कालिन मधेशी जनअधिकार फोरमलाई २०६४ साल चैत २८ गते भएको पहिलो संविधानसभा निर्वाचनमा जनताले ५३ सिट दिएको, २०७४ सालमा भएको निर्वाचनमा तत्कालिन संघीय समाजवादी पार्टी र राष्ट्रिय जनता पार्टीलाई प्रदेशमा सरकार बनाउने जिम्मा जनताले सुम्पिदिएको उल्लेख घोषणा पत्रमा गरिएको छ ।
‘अहिलेसम्म आउँदा यी दुई दलका नेता को कहाँ छन्, के गरिरहेका छन् ? भन्ने स्थिति सबैलाई थाहा भएकै हुनुपर्छ’ घोषणा पत्रमा भनिएको छ, ‘मधेशी नामबाटै उदाएको जनमत पार्टीले डेढ बर्ष प्रदेशको नेतृत्व गरेपनि प्रदेशमा उल्लेख्नीय काम गर्न सकेन् । र, हरेक सूचकांक पुरानै अवस्थामा यथावत छ ।’
मधेशी पार्टीको नाम धेरै पटक फेरिए पनि नेता र नेताको प्रबृत्ति नफेरिएका कारण विकास हुन नसकेको ठहर गरिएको छ ।
सनातनीको रक्षा
जन अधिकार पार्टीले सनातनीको रक्षालाई मुद्दा बनाएर घोषणा पत्र तयार गरेको छ । मधेश प्रदेशको विकासका साथसाथै लोकतन्त्र, गणतन्त्र, संघीयता, सामाजिक न्याय, समावेशिता, अभिव्यक्ति स्वतन्त्रता र सनातनीको रक्षाका निम्ति प्रतिबद्ध रहँदै अघि बढ्ने प्रणका साथ यो घोषणा पत्र तयार गरेको उक्त पार्टीले जनाएको छ ।
‘हामी सार्वजनिक सेवा प्रवाहलाई चुस्त दुरूस्त बनाउन, प्रदेश र स्थानीय तहको सम्बन्धलाई सुदृढ गर्दै विकासीय कामलाई जोड दिन, प्रदेशलाई आर्थिक रुपमा सशक्त बनाउन आन्तरिक आय वृद्धिका कार्यक्रमहरु ल्याउन, प्राकृतिक श्रोतसाधन परिचालन गरी प्रदेशलाई समृद्धीतर्फ अगाडि बढाउन, विकास साझेदारहरुसँग समन्वय र सहकार्य गरी प्रदेशको विकासका खाका कोर्न, छुवाछुतको अन्त्य गरी सामाजिक न्याय प्रदान गर्न अग्रपंक्तिमा रहने प्रतिबद्धता जनाउँदछौं’ घोषणा पत्रमा भनिएको छ ।
