राजविराज । डिप्लोमा इन्जिनियर्स एशोसिएशन, नेपाल (डिन) सप्तरीले सर्लाहीमा सब इन्जिनियर प्रमोद कुमार यादवको हत्याको निष्पक्ष तरिकाले शिघ्र छानबिन गर्न माग गरेको छ ।
डिनका जिल्ला अध्यक्ष रमेश कुमार यादव र सचिव सरोज यादवले आज संयुक्त विज्ञप्ती जारी गर्दै यस्तो माग गरेका छन् । घट्नाको निष्पक्ष, पारदर्शी र शिघ्र छानबिन गरी दोषीलाई कानुन बमोजिम कडा कार्वाही गर्न विज्ञप्तीमा माग गरिएको छ ।
शोकसन्तप्त परिवारलाई उचित क्षतिपूर्ती तथा राहत उपलब्ध गराउन, राष्ट्रसेवक कर्मचारीहरुको सुरक्षाको सुनिश्चितता गर्न र यस्ता घट्नाको पुनरावृत्ति नहुने गरी दिर्घकालिन सुरक्षा रणनीति अबलम्बन गर्न समेत विज्ञप्तीमा माग गरिएको छ ।
कर्तव्यनिष्ठ राष्ट्रसेवक कर्मचारीमाथि भएको यस्तो अपराधिक घट्ना राज्यको शान्ति सुरक्षा व्यवस्थामाथि नै गम्भीर चुनौति भएको भन्दै मृतकप्रति श्रद्धाञ्जली व्यक्त गरिएको छ ।
सिरहाको सुखीपुर नगरपालिका बैसाखा घर भएका सब इन्जिनियर यादव सर्लाही सदरमुकाम मलगंवास्थित पूर्वाधार विकास कार्यालयमा कार्यरत थिए ।
मलंगवास्थित घरबाहिर बोलाएर केही व्यक्तिले उनीमाथि गोली प्रहार गरेका थिए । उपचारका लागि अस्पताल लग्दा चिकित्सकले मृत घोषणा गरेका थिए ।
