राजविराज । पूर्व सांसद डा. सूर्यनारायण यादवले नेपाली कांग्रेसका उम्मेदवारलाई समर्थन गरेका छन् ।
२०७४ को चुनावमा सप्तरी क्षेत्र नम्बर १ बाट निर्वाचित यादवले क्षेत्र नम्बर १ मै कांग्रेसबाट अहिले उम्मेदवारी दिएका रामदेव साहलाई समर्थन गरेका हुन् ।
उम्मेदवार साहलाई समर्थन गर्दै डा. यादवले मत समेत माग्न शुरु गरेका छन् । उनी अहिले साहको घरदैलो कार्यक्रमहरुमा समेत सहभागी हुन थालेका छन् ।
२०७४ को चुनावमा उनी तत्कालिन समाजवादी पार्टीबाट निर्वाचित भएका थिए ।
डा. यादव चाँडै कांग्रेस प्रवेशको तयारीमा समेत छन् । ‘कांग्रेस परिवर्तन भएर आएको छ, मधेशको मुद्दालाई सम्बोधन गर्छ’ ग्रीन मधेशसँग कुरा गर्दै उनले भने, ‘नयाँ भएर आएको कांग्रेसको नीति मन परेकोले यसमा लागेको छु ।’
परिवर्तित कांग्रेसप्रति आकर्षित भएर समर्थन गरेको बताउँदै उनले मधेशवादको विषयमा पार्टीका अध्यक्ष गगन थापासँग पनि आफ्नो कुरा भएको बताए ।
कुराकानीका क्रममा विचार परिवर्तन गरेर पार्टी प्रवेश गर्न नसक्ने आफूले बताएको उनले बताए ।
‘यसपछि गगनजीले मधेशको मुद्दालाई अब कांग्रेसले नै समर्थन गर्ने बताउनुभएको छ’ डा. यादवले भने, ‘आफूलाई पनि मधेशको मुद्दा कांग्रेसले नै समभाधान गर्छ भन्ने लागेको छ ।’
