गंगा प्रसाद साह
भारदह, २१ भदौ ।
इलाका प्रहरी कार्यालय भारदहको इन्चार्जमा हाजिर भएका नयाँ वरिष्ठ प्रहरी नायव निरीक्षकलाई स्वागत र सरुवा भएर जान लागेकालाई विदाई गरिएको छ ।
हनुमाननगर कंकालिनी नगरपालिका १ भारदहस्थित उक्त प्रहरी कार्यालयको इन्चार्जको रुपमा गोकुल बलायर आएका छन् भने संजय न्यौपाने सरुवा भएका छन् ।
स्थानीय जनप्रतिनिधीले दुबैलाई फूलको माला र दोसल्ला ओढाएर स्वागत तथा विदाई गरेका छन् । दुबैलाई वडा नम्बर १ का निबर्तमान अध्यक्ष भीमराज मण्डलले दोसल्ला ओढाए ।
स्वागत तथा विदाई कार्यक्रममा स्थानीय जनप्रतिनिधी तथा बुद्धिजिवीले युवाहरु लागूऔषध कुलतमा फँसिरहेको बताउँदै यसलाई नियन्त्रण गर्न नयाँ इन्चार्जलाई सुझाए । उनीहरुले चोरी, तस्करी, शान्ति, सुरक्षामा ध्यान दिन पनि आग्रह गरे ।
नयाँ इन्चार्जको रुपमा आएका बलायरले सबैले सहयोग गरे शान्ति सुरक्षा मजबुत हुने र चोरी तस्करी पनि नियन्त्रण हुने बताए । उनले युवाहरु लागूऔषध प्रयोग गर्नेतर्फ अगाडि बढनु चिन्ताको बिषय रहेकाले यो नियन्त्रण गर्न स्थानीयले सहयोग गर्नुपर्ने बताए ।
सो अवसरमा वडा नम्बर १ भारदहका अध्यक्ष सुरेन्द्र मण्डल, वडा नम्बर ३ पोर्ताहाका अध्यक्ष विजय यादवसहितको उपस्थिति थियो ।
