निर्वाचनमा महिलाहरुको अर्थपूर्ण सहभागिता हुनुपर्नेमा जोड्

मधेश सम्वाददाता
राजविराज, २१ भदौ ।
आगामी निर्वाचनमा महिलाहरुको अर्थपूर्ण सहभागिता हुनुपर्नेमा जोड् दिइएको छ ।
राजविराजमा मंगलबार आयोजित एक कार्यक्रममा बोल्दै महिला अगुवाहरुले निर्वाचनमै महिलालाई पछाडि पार्दा निर्णायक ठाउँमा महिलाको सहभागिता हुन नसकिरहेको बताए । कार्यक्रममा सहभागी भएका विभिन्न दलका महिला सहभागीले प्रत्यक्ष चुनावमा टिकट लिएर प्रतिपस्पर्धा गर्न आफूहरु तयार रहेको भएपनि नेताहरुले टिकट नै दिन नमानेको बताए ।
संघीय सांसद सरिता गिरीले निर्णय गर्ने स्थानसम्म पहुँच बनाउन महिलाले आ–आफ्नो दल भित्र संघर्ष गर्नुपर्नेमा जोड् दिइन् । संघर्ष नगरे केही उपलब्धी नहुने भन्दै उनले त्यो संगै सबल र सचेत र शिक्षित एवं क्षमतावान पनि बन्नु जरुरी रहेको बताइन् ।
प्रदेश सांसद गीता यादवले सम्पत्तिको अधिकार नभएसम्म निर्वाचनमा महिलाको अर्थपुर्ण सहभागिता नहुने बताईन् । उनले आउने चुनावमा आ–आफ्नो दलभित्र संघर्ष गरेर प्रत्यक्षमा चुनाव लड्न महिलाहरुलाई आग्रह गरिन् ।
राजविराज नगरपालिकाका कार्यवाहक मेयर इसरत प्रवीणले महिलाको अर्थपूर्ण सहभागिताको लागि पहिला आफै आत्मनिर्भर बन्नुपर्नेमा जोड् दिइन् । उनले महिलालाई शिक्षा र क्षामता विकासमा लाग्नुपर्ने बताइन् ।
कार्यक्रममा संविधानसभा सदस्य मुन्नी गुप्ता, कृष्णासवरण गाउँपालिकाका पुर्व उपाध्यक्ष मिना चौधरी, जनमतका पार्टीका ममता झा, लोसपाका पुनम यादव, अधिवक्ता मनु खनाल, नेकपा माओवादीका रुवी झा, पत्रकार महासंघ सप्तरीका उपाध्यक्ष अम्बिका दहाल, पार्वती राउत सहितका महिलाको अर्थपूर्ण सहभागिता सन्दर्भमा आफ्नो विचार राखिन् ।
महिला महासंघ र संकल्प नेपालको सहयोगमा परिकल्पना नेपालले कार्यक्रमको आयोजना गरेको थियो । कार्यक्रमको उद्देश्यवारे आयोजक संस्थाकी सुधा देवले जानकारी गराएकी थिइन् ।