उपेन्द्र लड्न खोजेको सप्तरी–२ बाट लोसपा अध्यक्ष ठाकुरको पनि नाम सिफारिस

मधेश सम्वाददाता
राजविराज, २१ भदौ ।
जनता समाजवादी पार्टी (जसपा) का अध्यक्ष उपेन्द्र यादव आगामी चुनाव लड्न चाहेको सप्तरी–२ बाट लोकतान्त्रिक समाजवादी पार्टी (लोसपा) का अध्यक्ष महन्थ ठाकुरको नाम पनि उम्मेदबारमा सिफारिस गरिएको छ ।
लोसपा क्षेत्र नम्बर २ समितिको मंगलबार राजविराजमा बसेको बैठकले प्रतिनिधी सभा सदस्य उम्मेदबारका लागि अध्यक्ष ठाकुरसहित दुई जनाको नाम सिफारिस गरिएको नेता गजेन्द्र मण्डलले जानकारी दिए । उनका अनुसार अध्यक्षसँगै जयप्रकाश ठाकुरको पनि नाम सिफारिस गरिएको छ ।
२०७४ को निर्वाचनमा महन्थ ठाकुर महोत्तरी–३ बाट जितेका थिए भने जयप्रकाश ठाकुर सप्तरी–२ बाट स्वतन्त्र उम्मेदबार भएर लडेर पराजित भएका थिए ।
अध्यक्ष ठाकुरको नाम बारा–४ बाट पनि सिफारिस भएको छ । जसपा अध्यक्ष यादवको १० वटा निर्वाचन क्षेत्रबाट नाम सिफारिस भइसकेको छ ।