राजविराज । सप्तरी सदरमुकाम राजविराज नगरपालिका वडा नम्बर १ डुमरी निवासी राधेश्याम यादव घरपरिवार छाडेर सिन्धुपाल्चोक जिल्लामा मिहिनेत गरेर थाेरै रकम जाेडे । जाेडिएकाे रकम बैंक खातामा राखे । रकम सुरक्षित छ भन्ने विश्वास उनलाई थियो ।
तर उनको याे विश्वास एकछिनमै तुहियाे ।
यादवले बैंक खातामा रू चार लाख ५० हजार राखेका थिए । कुमारी बैंककाे राजविराज शाखामा उनले खाता खाेलाएर रकम जम्मा गर्दै आएका थिए ।
खातामा जम्मा रहेको रकम भने एक्कासी गायब भएपछि अहिले राधेश्यामको निन्द्रा हराएको छ । उनी मात्र होइन उनको परिवार नै शोकमा डुबेका छन् ।
सिन्धुपाल्चोक जिल्लाको नुगल गाउँपालिका वडा नम्बर १ स्थित शिलाङ्ग माविमा राहत शिक्षकको रुपमा कार्यरत यादव असारको दोस्रो साता घर आएका थिए ।
घर आउँदा आफ्ना परिवारजन सँग भेट गर्दै खुशी साटे । तर यीनको खुशी एक दिन पनि टिक्न सकेन । भोलि पल्ट उनलाई फोन आउँछ, ‘तपाईंको खाताबाट रकम गायव भैसकेको छ ।’
यसपछि उनी हाङाबाट खसे झैं भए ।
आश्चर्यको कुरा उनको खाता रहेको कुमारी बैंक राजविराज शाखाबाट फोन आएको रहेनछ । ‘कपिलवस्तुको तौलिहवा शाखाबाट फोन आएको रहेछ’ उनले भने, ‘ यसपछि राजविराज शाखामा गएर बुझ्दा सही नै रहेछ ।’
मोबाइल बैंकिङ प्रयोग गरेपनि कसैलाई कुनै ओटिपी नदिएको, कुनै लिंकमा क्लीक नगरेको उनले बताए ।
मोबाइल बैंकिङ प्रयोग गर्दा अपनाउनुपर्ने सबै सावधानी अपनाएको उनको भनाई छ ।
‘तथापि कसरी रकम निस्कियाे, आश्चर्यचकित संगै पीडामा छु’ उनी भन्छन् ।
‘छाेरीकाे विवाहका लागि रकम जम्मा गर्दै थिएँ’ उनले भने’ मिहिनेत गरिएको कमाई एक्कासी गायब भएपछि परिवार नै चिन्तित छन् ।’
यादवले घट्नाबारे जिल्ला प्रहरी कार्यालय, सप्तरीमा निवेदन दिएको बताए । निवेदन दिएपनि गम्भीर तरिकाले सुनुवाइ नभएको गुनासो उनको छ ।
यादवले एक्कासी आफ्नो खाताबाट रकम गायव भएको घटनामा सहयोग गरिदिन सबैसँग हार्दिक अनुरोध गरेका छन् ।
