राजविराज । बिना कारण कर्मचारीलाई हातपात गर्नेलाई कार्वाहीको माग गर्दै सप्तरीको कञ्चनरूप नगरपालिकाकाका कर्मचारी असार मसान्तको क्लोजिङ समयमा आन्दोलनमा उत्रिएका छन् ।
कर्मचारीलाई हातपात गर्नेलाई अभद्र व्यवहारमा मुद्दा दर्ता गर्न माग गर्दै नगरपालिकाका कर्मचारीले इलाका प्रहरी कार्यालय, कञ्चनपुरमा निवेदन दिएका छन् । कर्मचारीलाई कार्वाही नगरिए कामकाजमा नफर्किने उनीहरूले अडान राखेका छन ।
सोमबार दिनको अन्दाजी ४:१५ बजेको समयमा अभियन्ता भन्ने रतीसुमन गुप्ता (बिदु), टुनटुन मण्डल, बिनोद पासमान, प्रदिप पासमान समेतका साथै अन्य नचिनेका ५/७ जनाहरु अकस्मात आई भिडियो बनाउने, पालिकाका कर्मचारीहरुलाई गाली गलौज, कुटपिट गरेको, यस नगरपालिकाका नगर प्रहरीहरुले सम्झाई बुझाई गर्दा पनि निजहरुले नगर प्रहरीहरु माथि हातपात गरेको र नगरपालिकाको कर्मचारीहरु रामसुन्दर यादव र लक्षमण मण्डल समेतलाई हातपात गरेको निवेदनमा उल्लेख गरिएको छ ।
‘ती व्यक्तिहरु पालिका बाहिर गएर ज्यान मार्ने धम्की समेत दिएर गएको हुँदा हामी राष्ट्रसेवक कर्मचारीहरु सालतमामीको समयमा कामको चाप भएको बेला निजहरुबाट असुरक्षित भई काम काज गर्न नसक्ने अवस्था रहेको व्यहोरा अनुरोध गर्दछौं’निवेदनमा भनिएको छ, ‘उक्त हुलहुज्जत गर्ने, कुटपिट गर्ने तथा गाली गलौज गर्ने उल्लेखित व्यक्तिहरुले सार्वजनिक स्थलमा शान्ति सु-व्यवस्था खलबलाउने कार्य गरी भय श्रृजना गरेको हुँदा भय रहित अवस्था श्रृजना नभएसम्म हामी कर्मचारीहरु कामकाज गर्न नसक्ने अवस्था छ ।’
उनीहरुलाई अभद्र व्यवहार अन्तर्गत कानूनी कारबाही गरिदिन हुन अनुरोध गर्दै नगरपालिकाका प्रमुख प्रशासकीय अधिकृत तुलराज थापा मगरले सम्पुर्ण कर्मचारीको तर्फबाट बुझाएको जनिवेदनमा भनिएको छ, ‘सेवा प्रवाहमा पर्न जाने असर प्रति हामी क्षमा प्रार्थी छौं।’
निवेदनमा ती व्यक्तिहरू दिनहुँ पालिकामा आउने अनावश्यक तथ्याङ्ग मौखिक रुपमा माग्ने, लिखित रुपमा माग नगर्ने, कार्यालयको तर्फबाट प्रमुख प्रशासकीय अधिकृतबाट आ.व.को अन्तिम समय छ, मसान्त समाप्ती पछि माग गरिएका तथ्याङ्क उपलब्ध गराउँछु भन्दा भन्दै नियतबस घटना घटाइएको निवेदनमा उल्लेख छ ।
निवेदनमा जिल्ला प्रहरी कार्यालय सप्तरी, भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालय, सिंहदरवार, काठमाडौं, जिल्ला प्रशासन कार्यालय, सप्तरी, राजविराज, नगर प्रमुख रउप प्रमुख कञ्चनरुप नगरपालिका, कंचनपुर, सप्तरीलाई बोद्दार्थ दिइएको छ ।
