राजविराज । सप्तरीको अग्नीसाइर कृष्णसवरन गाउँपालिका–६, महुली मोहनपुरमा जंगली हात्तीको बथानले ठूलो क्षति पुर्याएको छ। सोमबार राति करिब १० बजेदेखि गाउँमा प्रवेश गरेको दर्जनौँ हात्तीको समूहले बिहान ३ बजेसम्म लगातार करिब पाँच घण्टा ताण्डव मच्चाउँदै कृषकहरूको अन्नबाली सखाप पारेको हो।
हात्तीको हुलले भित्र्याउने तयारीमा रहेको मकैबाली कुल्चिएर नष्ट गर्नुका साथै रोपाइँका लागि तयार पारिएको धानको ब्याड पनि पूर्ण रूपमा नष्ट गरेको स्थानीयले बताएका छन्। एकैपटक ठूलो सङ्ख्यामा गाउँको बीचसम्म हात्ती प्रवेश गरेपछि स्थानीयवासी रातभर त्रासमा बसेका थिए।
वर्षभरि मेहनत गरेर उत्पादन गरेको अन्नबाली नष्ट भएपछि प्रभावित किसानहरू गहिरो चिन्तामा परेका छन्। स्थानीयका अनुसार यस क्षेत्रका किसानले विगत ३५ वर्षदेखि निरन्तर जंगली हात्ती तथा अन्य वन्यजन्तुको आतंक खेप्दै आएका छन्।
यस विषयमा संघीय संसदको प्रतिनिधिसभा बैठकमा सांसद खगेन्द्र कर्णले शून्य समयमा बोल्दै सरकारको ध्यानाकर्षण गराउँदै जंगली हात्ती नियन्त्रण तथा प्रभावित किसानको राहत र क्षतिपूर्तिका लागि तत्काल प्रभावकारी योजना अघि बढाउन माग गरेका छन्। साथै, दीर्घकालीन रूपमा मानव–हात्ती द्वन्द्व न्यूनीकरणका लागि आवश्यक संरक्षण तथा व्यवस्थापनका कार्यक्रम कार्यान्वयन गर्न सरकारसँग आग्रह गरिएको छ।
