राजविराज । सप्तरीमा लिटिल स्टार्स शो २०२६ को आयोजना गरिने भएको छ ।
मिस्ट्री डान्स गाइज विराटनगरको आयोजनामा सप्तरी कालाकार संघ नेपालको समन्वयमा शोको आयोजना गरिने भएको हो ।
सदरमुकाम राजविराजम आयोजना हुने यो शोको अडिसन भदौ ६ गतेदेखि गरिने आयोजकको तयारी छ ।
आयोजकले शनिबार पत्रकार सम्मेलनको आयोजना गरी शोबारे जानकारी दिएको छ ।
आयोजक संस्थाका कार्यक्रम निर्देशक रौनक अग्रबालले वाक कला, हाजिरी जवाफ, प्रश्नोत्तर, हाउभाउ, व्यक्तित्व, कला, नृत्य र प्रस्तुतीसहितका मूल्यांकन विधी प्रयोग गरिने बताए ।
त्यसअघि सहभागीहरुलाई उक्त विषयहरुमा तीन चरणमा २८ दिनको तालिम पनि दिईनेछ । सहभागीहरुलाई कोरियोग्राफर, फोटोग्राफर, डान्सर तथा विभिन्न बिषयका विज्ञ प्रशिक्षकबाट तालिम प्रदान गरी ग्राण्ड फिनाले का लागि छनौट गरिने अग्रवालले बताए ।
सहभागीहरुलाई निर्णायक मण्डली मार्फत् विजेताको छनौट गरिने बताए ।
शो मा ६ देखि ९ तथा १० देखि १४ बर्ष उमेर समूहका गरी दुई समूहमा प्रतिस्पर्धा गराइने आयोजकले जनाएको छ ।
शो जित्न भन्दा पनि सिकाउनका लागि र प्रतिभा खोज्नका लागि आयोजना गर्न लागिएको आयोजक संस्थाका अध्यक्ष संजीव सहनीले पत्रकार सम्मेलनमा जानकारी दिए ।
मोडलिङ्गमा रुचि भएका, विभिन्न कारणले क्षमता प्रष्टफुटित गर्ने अवसर नपाएकाका लागि यो शो विशेष रहने उनको भनाई छ ।
बालबालिकाको क्षमता प्रष्टफुटित भएर व्यक्तित्व विकास अभिवृद्धि र प्रतिभा मार्फत देश तथा अन्तराष्ट्रियस्तरमा छुट्टै पहिचान स्थापित गराउने उद्देश्यले शोको आयोजना गर्न लागिएको उनले बताए ।
शो मा सहभागी हुनेका लागि दर्ता शुल्क रु ५०० तथा तालिम बापत १५ हजार रुपैयाँ शुल्क निर्धारण गरिएको छ ।
यो शो राजविराजपछि क्रमशः जनकपुर, पोखरा, धनकुट्टा, चितवन, काठमाडौं र विराटनगरमा हुने तथा त्यसपछि छनौट भएकाहरुबीच नेपाल लिटिल स्टार्स शो को आयोजना गरिने आयोजकको भनाई छ ।
पत्रकार सम्मेलनमा सप्तरी कलाकार संघ नेपालका अध्यक्ष करण शर्मा, सचिव विवेकानन्द यादवसहितको उपस्थिति थियो ।
