राजविराज । सिरहा प्रहरीले गोली चलाएर नियन्त्रणमा लिएकामध्ये सप्तरीका एक जना कारागारबाट भागेका र अर्को व्यक्ति ज्यान मार्ने उद्योग मुद्दाका कसुरदार रहेको पाइएको छ ।
सिरहाको लहान नगरपालिका वडा नम्बर ३ स्थित हस्पिटल रोडमा प्रहरीले गोली चलाएर सप्तरीका पाँच जनासहित ६ जनालाई पक्राउ गरेको थियो ।
पक्राउ परेकामध्ये रुपनी गाउँपालिका वडा नम्बर १ बस्ने ४२ बर्षीय महम्द नाजिर मियाँ कारागारबाट फरार भएका व्यक्ति रहेको खुलेको छ ।
ज्यान सम्बन्धी कसुरमा सप्तरीजिल्ला अदालतको २०८० साल साउन ३२ गते २५ बर्ष कैद सजया ठहर भई झुम्का कारागारमा उनी कैद सजाय भोगिरहेका थिए ।
उनी जेनजी आन्दोलनका क्रममा २०८२ साल भदौ २४ गते कारागारबाट भागेका थिए ।
यस्तै, नाजिरसँगै लहानबाट समातिएका बोदे बर्साइन नगरपालिका वडा नम्बर २ नेङ्गडा टोल बस्ने शम्भु प्रसाद यादवविरुद्ध इलाका प्रहरी कार्यालय कडरबोनामा दुई पटक ज्यान मार्ने उद्योगमा मुद्दा दर्ता भएको पाइएको सिरहा प्रहरीका प्रवक्ता एवं डीएसपी रमेश बहादुर पालले बताए ।
२०७७ साल साउन १३ गते र २०८२ साल फागुन ५ गते गरी दुई पटक ज्यान मार्ने उद्योगमा मुद्दा दर्ता भएपनि उनी फरार रहेका थिए ।
नाजिर र शम्भुसँगै सिरहा प्रहरीले बोदे बर्साइन नगरपालिका वडा नम्बर २ बस्ने २४ वर्षीय बैजनाथ प्रसाद यादव, डाक्नेश्वरी नगरपालिका २ का २८ वर्षीय जमाहिर आलम र ३२ वर्षीय मो. ईमामुद्दिन तथा भारतको बिहारका २२ वर्षीय बिद्यानन्द यादवलाई पक्राउ गरेको थियो ।
उनीहरूको साथबाट २४३ ग्राम ब्राउन सुगर बरामद भएको थियो ।
