राजविराज । सुनसरीको देवानगंज गाउँपालिकामा ज्यान जानेगरी हिन्दुमाथि भएको आक्रमणको हिन्दू सम्राट नेपालले कडा रुपमा विरोध गर्दै दोषीलाई अबिलम्ब पक्राउ गरी कार्वाही गर्न माग गरेको छ ।
हिन्दू सम्राट, सप्तरीले सोमबार प्रेस विज्ञप्ती जारी गर्दै घटनामा संलग्न सम्पूर्ण दोषी, घटनाको योजनाकारहरुलाई अविलम्ब पक्राउ गरी कडा कानुनी कार्वाही गर्न माग गरेको छ ।
घटनाको निष्पक्ष उच्चस्तरीय छानबिन गरी गोली चलाउने दोषीहरु, घटनाको योजनाकारहरु र पृष्ठभूमि सार्वजनिक गर्नुपर्ने, मृतक परिवारलाई उचित क्षतिपूर्ति र घाइतेहरुको सम्पूर्ण उपचार देशले निःशुल्क गर्नुपर्ने माग विज्ञप्तीमा गरिएको छ ।
घटनामा प्रशासनिक लापरबाही र सुरक्षा कमजोरी भएकोले सम्बन्धित जिम्मेवार अधिकारीहरुमाथि समेत कड़ा कार्वाही गर्नुपर्ने, सनातनी हिन्दुहरुको पर्व त्यौहारमा बारम्बार हुने आक्रमण रोक्न सरकारले कड़ा कदम चाल्नुपर्ने, रोहंगिया, बंगलादेशी विदेशी घुसपैठिहरुलाई देश निकला गरी घुसपैठ रोक्न सीमा सुरक्षा कड़ा बनाउनुपर्ने माग गरिएको छ ।
सनातनी हिन्दुहरुको धार्मिक आस्थाका साथ शान्तिपूर्ण रुपमा गइरहेका श्रद्धालुमाथि गोली प्रहार गरी हत्या गर्ने जघन्य अपराधमा संलग्न कसैलाई पनि राजनीतिक वा प्रशासनिक संरक्षण दिइएमा त्यसको सशक्त प्रतिकार गर्ने चेतावनी दिदैं सम्राटका पदाधिकारीले प्रमुख जिल्ला अधिकारी श्यामकृष्ण थापा मार्फत् नेपाल सरकारलाई समेत उक्त विज्ञप्ती पठाएका छन् ।
मागहरु तत्काल सम्बोधन गरी दोषीलाई कड़ा कार्वाही नगरिए समस्त सनातनी ॐकार परिवार, हिन्दुवादी संघ संस्था हामी सबै जना एकजुट भएर देशव्यापी सशक्त विरोध प्रदर्शन र कड़ा आन्दोलन गर्ने र त्यसबाट उत्पन्न हुने सम्पूर्ण परिस्थिति र क्षतिको जिम्मेवारी राज्य र सरोकारवालाहरु स्वयं हुने चेतावनी समेत दिइएको छ ।
