राजविराज । सप्तरी प्रशासनले समाजमा उत्तेजना नफैलाउन सबैसँग आग्रह गरेको छ । यस्तो गर्नेलाई कानुन अनुसार कार्वाही गर्ने चेतावनी प्रशासनले दिएको छ ।
जिल्ला प्रशासन कार्यालयले आज एक सूचना जारी गर्दै समाजमा उत्तेजना फैलाउने, धार्मिक भावनामा आघात पुर्याउने वा कानुनी व्यवस्था हातमा लिन खोज्ने जो–कोहीलाई कार्वाही गर्ने जनाएको छ । ‘यस्तालाई मुलुकी अपराध संहिता, २०७४ र विद्युतीय कारोबार ऐन, २०६३ बमोजिम कार्वाही भईजाने व्यहोरा सूचित गरिन्छ’ प्रमुख जिल्ला अधिकारी श्यामकृष्ण थापाले जारी गरेको सूचनामा भनिएको छ ।
पछिल्लो समयमा अन्य जिल्लाहरुको घटनाको सन्दर्भलाई लिएर सामाजिक सञ्जालहरूः (फेसबुक, टिकटक, इन्स्टाग्राम, युट्युव आदि) मार्फत भ्रामक अफवाह फैलाउने, एक अर्काको धर्म, आस्था, संस्कृति वा समुदायप्रति लक्षित गरी घृणा फैलाउने भाषण गर्ने र अमर्यादित टीका टिप्पणी गरी सामाजिक सद्भाव विथोल्न खोज्ने, सामाजिक सद्भावमा आँच आउन सक्ने खालका हुने गरेको गतिविधीप्रति जिल्ला प्रशासन कार्यालय सप्तरीको गम्भिर ध्यानाकर्षण भएको सूचनामा भनिएको छ ।
जिल्लामा आपसी सद्भाव, शान्ति, सुरक्षा र अमनचयन तथा बहुजातीय, बहुभाषिक र बहुधार्मिक विशेषता बोकेको सुन्दर पहिचानलाई कायम राख्न सबैको साझा दायित्व भएकोले जिल्लाभित्र विभिन्न जातजाति, भाषाभाषी, धर्म र सम्प्रदायका नागरिकहरूबीच आपसी एकता, सद्भाव, सहिष्णुता र भ्रातृत्व कायम राख्न सम्पूर्ण नागरिक, धार्मिक गुरुहरू, नागरिक समाज, बुद्धिजीवी, सञ्चारकर्मी लगायत सबै सरोकारवालाहरु समक्ष हार्दिक अपील गरिएको छ ।
