राजविराजमा आगलागीमा परी १५ लाखबढीको क्षति

घुर बालेर सुत्दा राजविराजमा आगलागी भएको छ । आगलागीले तीन वटा गाई समेतको जलेर मृत्यु हुँदा लाखौंको क्षति भएको छ ।
नगरपालिकाको वडा नम्बर १२ स्थित दमावती टोलमा बिहीबार आगलागी भएको हो ।
सोही ठाउँका कैलु मण्डलको घरमा भएको आगलागीबाट एक घर, एक गोठ जलेर पूर्ण रुपले नष्ट भएको छ ।
आगलागीबाट गोठमा बाँधिएको ३ वटा गाईको जलेर मृत्यु हुँदा एउटा बाछो जलेर घाइते भएका छन् ।
यसबाहेक नगद, गरगहना, खाद्यान्न, लत्ताकपडा, फर्निचर, भाडाबर्तन पूर्ण रुपले जलेर नष्ट भएको पीडित मण्डलले बताए ।
राति २ बजे लागेको आगोलाई अस्थायी प्रहरी विट तेतरी गाछी र स्थानीयको सहयोगमा २ घण्टा पछि नियन्त्रणमा आएको स्थानीयले बताएका छन् ।
प्रारम्भिक क्षतिको विवरण अनुसार आगलागीमा परी १५ लाखबढीको क्षति भएको प्रहरीले जानकारी दिएको छ ।