राजविराज । जनअधिकार पार्टीका अध्यक्ष डा. शरदसिंह यादवले सुनसरीको देवानगञ्ज गाउँपालिका ३ कप्तानगञ्जको घटना पूर्व योजना अनुसार भएको हुन सक्ने बताएका छन् ।
कप्तानगञ्जबाट फर्किएका अध्यक्ष यादवले सोमबार राजविराजमा पत्रकारहरुसँग कुरा गर्दै यस्तो बताएका हुन् । ‘घटना शंकास्पद छ र पूर्व योजना अनुसार भएको स्थानीयहरुबाट पाएँ’ अध्यक्ष यादवले भने, ‘त्यहीं भएर उच्चस्तरीय न्यायीक छानबिन आयोग बनाउनु जरुरी छ ।’
उनले उच्चस्तरीय न्यायीक छानबिन आयोग नबनाएसम्म घटनाहरु नरोकिने बताए ।
मधेशमा हरेक पर्वको समयमा घटना हुने र त्यसलाई बहाना दिएर धर्मको रंग र नाम दिएर छोडेको देखिएको उनको भनाई छ ।
‘पटक–पटक तराई मधेशमा यो घटनाहरु घट्दै आएको छ’ उनले भने, ‘पहिला घटना घटाउने, व्यक्ति हत्या हुने त्यसपछि सदभाव र्याली निकाल्ने, सम्झौतहरु गर्ने गरिन्छ । तर मृतकका परिवार जीवनभर पीडा गुजार्ने गर्छन् ।’
त्यहीं भएर न्यायीक छानबिन आयोग बनाएर घटना कसरी भइरहेको छ ?, कहाँबाट भइरहेको छ ? निर्देशन कहाँबाट छ ? पत्ता लगाउनु जरुरी रहेको उनले बताए । ‘जबसम्म सरकारले यी तथ्य पत्ता लगाउँदैन र यसको गम्भीर कार्यन्वयन गर्दैन तबसम्म मधेश अशान्त रहन्छ’ उनले भने ।
खुला सिमानाका कारण थुप्रै देशका अनागरिकहरु मधेशमा छिरिरहेको उनले बताए ।
रोहिंग्या, सोमालिया र पाकिस्तानका शरणार्थीहरु आइरहँदा मधेश अशान्त भइरहेको बताउँदै उनले संघीयता नरुचाउने व्यक्तिहरु पनि यसमा लागेका आशंकाहरु व्याप्त रहेको बताए ।
कप्तानगञ्जको अवस्था विकाराल रहेको र मृतक जयप्रकाश र ओमप्रकाश मेहताको परिवार पीडामा रहेको उनले सुनाए । मृतक परिवारको न्यायका लागि आफ्ेनो पार्टी लागिरहने उनले बताए ।
