छिन्नमस्ता मन्दिरको व्यवस्थापन र सुरक्षा राम्रो बनाउन छलफल

राजविराज । मुलुककै प्रसिद्ध छिन्नमस्ता भगवती मन्दिरलाई यस पटकको दशैंमा थप ब्यबस्थित बनाउनुपर्नेमा सरोकारवालाले जोड दिएका छन् ।
दशैमा पूजापाठ र दर्शन गर्न भक्तजनलाई सजिलो बनाउन छिन्नमस्ता गाउँपालिकाले शनिबार आयोजना गरेको सरोकारवालासँगको अन्तरक्रिया कार्यक्रममा बोल्दै बक्ताहरुले मन्दिरमा दशैमा श्रद्धालुको अत्यधिक भिड हुने भएकाले व्यवस्थापनमा ध्यान दिनुपर्नेमा जोड् दिए ।
कार्यक्रमका सहभागीहरुले पार्किङ, शौचालय, हुने गरेको चोरीमा ध्यान दिनुपर्ने बताए ।
कार्यक्रमका प्रमुख अतिथि प्रमुख जिल्ला अधिकारी भुपेन्द्र थापाले चोरी, लुटपाट, मदिरा सेवन नियन्त्रण गर्न प्रहरी, प्रशासन तयार रहेको बताए ।
कानुनभित्र रहेर सबैले गतिविधी गर्नुपर्ने बताउँदै उनले कानुन बाहिर जाने जोकोहिलाई पनि कार्वाही हुने बताए । ‘यसमा सबैको सहयोग आवश्यक छ’ उनले भने ।
जिल्ला प्रहरी प्रमुख एसपी अविनारायण काफ्लेले सुरक्षामा कुनै कमी आउन नदिने बताए ।
सुरक्षाका निम्ति मन्दिरभित्र रक्सी पिएर जानेलाई प्रहरीले समातेर कानुनको दायरामा ल्याउने भन्दै उनले तोकिएको समय भन्दा बढी रक्सी पसल चलाउन नदिने बताए ।
भक्तजनलाई ठग्ने ब्यापारीलाई कानुनको दायरामा ल्याइने बताउँदै उनले माताको नाममा ठग्नेलाई छाड्न नमिल्ने बताए ।
नेपाल पत्रकार महासंघ, सप्तरीका अध्यक्ष श्रवण कुमार देवले छिन्नमस्ता गाउँपालिकामा अहिले युवा र कुरा बुझन सक्ने जनप्रतिनिधी आएको भन्दै पालिकाको विकास हुने विश्वास व्यक्त गरे । उनले राम्रा बिषयमा एकजुट भएर काम गर्न जनप्रतिनिधीसँग आग्रह गरे ।
मन्दिरका पिठाधिश महाकान्त ठाकुरले मन्दिरको गिलेशनको भाडा २ बर्षदेखि भाडामा दिएकाहरुले नतिरेको जानकारी गराए । उनले गिलेसनका सटरहरु कब्जा गरेरै राखेको बताए । यहाँका व्यापारी दरभंगाबाट ८० रुपैयाँ प्रतिकिलो दरमा पाइने बुनियाँ किनेर ल्याई यहाँ लड्डु बनाएर बेच्ने गरेको बताए ।
‘यो मन्दिर सबैको हो । प्रतिष्ठा यहाँकै बसिन्दाको जोडिएको छ’ उनले भने, ‘माताको शपथ खाएर यस्ता काम रोक्नु जरुरी छ ।’