मधेश सम्वाददाता
राजविराज, १० असोज ।
निरन्तर चोरी हुँदा पनि प्रहरीले ध्यान नदिएको भन्दै चोरी पीडितहरु संगठित भएका छन् । चोरी पीडितहरुले संघर्ष समिति बनाएका छन् ।
समितिका संयोजक सुनिता साहको नेतृत्वमा बनेको संघर्ष समितिमा खेलानन्द दास, पार्थो सरकार, प्रतिमा देव, रंजित साह, दिनेश साह, गौरीशंकर प्रसाद साह सदस्य छन् ।
गठन भएको संघर्ष समितिद्वारा सोमबार राजविराजमा प्रदर्शन गरिएको छ । राजविराजभित्रै चोरीका घट्ना व्याप्त बढेपनि प्रहरीले कुनै चासो नराखेको भन्दै प्रदर्शन गरिएको हो ।
स्थानीय शिब मन्दिर प्राङणबाट निकालिएको बिरोध जुलुस नगरको बिभिन्न भाग परिक्रमा गरेको छ ।
प्रदर्शनकारीले ‘जनताप्रति स्थानीय सरकार उत्तरदायित्व निर्वाह गर, निर्धक्क व्यपार व्यवसाय गर्ने वातावरण निर्माण गर, चोरीका घटनालाई नियन्त्रण गर, सिसि क्यामरा सार्वजनिक स्थलमा जडान गर, प्रहरी, प्रशासन मुर्दावाद, स्थानीय सरकार मुर्दावाद’ सहितका नारा लगाएका थिए ।
निकालिएको ¥यालीमा संघर्ष समितिका पदाधिकारीसहित चोरी पीडितहरुको समेत सहभागिता रहेको थियो ।
