राजविराज । एमाले अध्यक्ष केपी शर्मा ओलीले प्रहरी प्रशासन अहिलेको गठबन्धन सरकारको कारिन्दा नरहेको बताएका छन् । उनले सरकारको गलत निर्देशन पालना नगर्न प्रहरी प्रशासनलाई आग्रह गरेका छन् ।
सप्तरीको कंचनरुप नगरपालिकामा शनिबार आयोजित आमसभालाई सम्बोधन गर्दै उनले धाँधलीवाद सरकारप्रति वफादार नहुन आग्रह गरे । ‘सरकारले अलोकतान्त्रिक आदेश दिन्छ भने अस्वीकार गर्नुपर्छ’ उनले भने, ‘कानुनको राज्य स्थापित गर्ने तपाईंहरुको पनि अधिकार हो ।’
कानुन बाहिर एमाले नजाने भन्दै उनले कहीं पनि बिथोल्ने, होहल्ला कसैले गर्न नहुने बताए ।
ओलीले सत्तारुढ गठबन्धनले नै नागरिकताको समस्या समाधान हुन नदिएको आरोप लगाए । ‘म प्रधानमन्त्री हुँदा संसद नभएका बेला अध्यादेश मार्फत् नागरिकताको समस्याको समस्या समाधान गर्न खोजेको थिएँ’ ओलीले भने, ‘तर गठबन्धनमा रहेकाहरुले मुद्दा हाले । अदालतको दुरुपयोग गरेर रोक्न लगाए ।’
