जनताले दिएको जनमतलाई हृदयदेखि नै स्वीकारें : उमेश यादव

राजविराज, ६ मंसिर । लोकतान्त्रिक–बाम गठबन्धनबाट सप्तरी प्रदेश सभा २ (२) बाट उम्मेदबार भई पराजित भएका उमेश यादवले जनताले दिएको जनमतलाई हृदयदेखि नै स्वीकार गरेका बताएका छन् ।
यादवले अबका दिनमा मधेसी जनता, राष्ट्रिय स्वाधिनता र संविधानको रक्षा गर्दै सप्तरीवासीको अधिकार र आत्मसम्मानको तथा उत्पीडित वर्ग र समुदायको पहुँच एवं पहिचानलाई कुनै पनि कोणबाट प्रहार हुन नदिने प्रतिबद्धता पनि जनाएका छन् । ‘यो आन्दोलनको झण्डालाई कहिल्यै झुक्न नदिने विश्वास दिलाउन चाहन्छु’ उनले सामाजिक संजाल फेसबुकमा लेख्दै बताएका छन् ।
राजनीतिक जीवनमा साथ, सहयोग र भरोसा गर्ने सप्तरीवासी जनता, मतदाता एवं माओवादीका र अन्य राजनीतिक दलका नेता÷कार्यकर्ताहरुलाई नमन गर्दै उनले विजयी हुने उम्मेदवारलाई बधाई तथा शुभकामना दिएका छन् ।