राजविराज, १० मंसिर । सप्तरीम मुख्य दुई दलका जिल्ला अध्यक्ष नै प्रतिनिधीसभाको निर्वाचनमा पराजित भएका छन् । नेपाली कांग्रेस र नेकपा एमालेका जिल्ला अध्यक्ष पराजित भएका हुन् ।
कांग्रेसका जिल्ला सभापति रामदेव साह सप्तरी क्षेत्र नम्बर १ बाट र एमाले अध्यक्ष तारकान्त चौधरी क्षेत्र नम्बर ३ बाट प्रतिनिधी सभा सदस्य पदमा उम्मेदबारी दिएका थिए । बिहीबार साँझ यी दुबै क्षेत्रको सार्वजनिक भएको अन्तिम परिणाम अनुसार दुबै जना पराजित भएका छन् ।
कांग्रेस सभापति साह जसपाका उम्मेदबार नवलकिशोर साहसँग पराजित भएका छन् । २३ हजार ५६४ मतसहित नवलकिशोर निर्वाचित हुँदा रामदेव १४ हजार ३१२ मतसहित तेस्रो स्थानमा रहे । जनमत पार्टीका उम्मेदबार जयकान्त राउत १९ हजार ९९२ मत प्राप्त गरी दोस्रो स्थानमा रहे ।
एमाले अध्यक्ष चौधरी भने कांग्रेसका केन्द्रीय सदस्य समेत रहेका दिनेश यादवसँग पराजित भएका छन् । २६ हजार १६६ मत ल्याएर यादव निर्वाचित हुँदा चौधरी २२ हजार ३०० मत ल्याएर दोस्रो स्थानमा रहे ।
