मधेश सम्वाददाता
राजविराज, २४ पुस ।
सप्तरी क्षेत्र नम्बर २ बाट निर्वाचित प्रदेश सभा सदस्यहरु राजविराज कारागारको अनुगमन गरेका छन् । बर्षाैदेखि जिर्ण रहेका र क्षमताभन्दा बढी कैदी÷बन्दी राखिएको कारागार समस्या नै समस्याबाट ग्रसित हुँदै गएको सूचना पाएपछि उनीहरुले कारागारको शनिबार अनुगमन गरेका हुन् ।
क्षेत्र नम्बर २ को १ बाट निर्वाचित सतिश सिंह र २ को २ बाट निर्वाचित महेश यादवले कारागार अनुगमन गर्दै यहाँको समस्याबारे जानकारी लिएका छन् ।
१५५ जनालाई राख्ने क्षमता भएको यो कारागारमा अहिले ३७७ जना कैदी÷बन्दीलाई राखिएको छ । क्षमता भन्दा तेब्बर कैदीबन्दी भएपछि ठाउँ अभावका कारण अत्यधिक चिसोमा कतिपय कैदीबन्दीलाई टिनको छाना लगाएर भुँइमै न्यानो कपडा राखी सुताउने गरिएको छ ।
जिर्ण बन्दै गएको कारागारमा क्षमताभन्दा बढी व्यक्तिलाई कोचिएर राखिएको मात्र होइन् दरबन्दी अनुसारको सुरक्षाकर्मी समेत छैन् ।
यसबाहेक विद्युतको लाइन कट्दा अँध्यारो हुन्छ कारागारमा । कारागार कर्मचारीका अनुसार जेनेरेटर र इन्भर्टर समेत नहुँदा विद्युतको लाइन गएपछि यहाँ अँध्यारोको सामना गर्नुपरिरहेको अवस्था छ । लाइन कट्ने बेला मोवाइल बालेर या टर्च लाइटले सुरक्षाकर्मी निगरानी गर्न बाध्य छन् ।
क्षमता भन्दा तीन गुणा बढी कैदीबन्दी भएपछि शौच गर्नेदेखि खाना पकाउन र खान समेत लाइन लाग्नुपर्ने समस्या छ ।
हाल कारागारमा पारालाइसिस रोगले थलिएका ६ जना जेष्ठ नागरिक कैदीबन्दी पनि छन् । उनीहरुलाई चिसोबाट जोगाउन र व्यवस्थापन गर्न समस्या भएपनि उपलब्ध श्रोत साधनले हरसम्भव सहयोग गरिरहेको कारागार प्रशासनले जनाएको छ ।
मुलुककै पुराना कारागार मध्ये एक राजविराज कारागारको जग्गा २ विघा १३ धुर क्षेत्रफल भएपनि १ विघा जग्गा अतिक्रमणको चपेटामा परेको छ । अतिक्रमणको बिषयमा यसअघि पटक–पटक आवाज उठेपनि राज्यले कुनै किसिमको ध्यान दिएको छैन् ।
कैदी बन्दी बस्ने ठाउँ मात्र नभई खटिएका सुरक्षाकर्मीहरुको बास बस्ने आवास समेत जीर्ण अवस्थामा रहेको छ । यो कारागार राणाकालमै २००८ सालमा निर्माण भएको हो ।
कारागारको भवन तथा भित्ताहरुको अवस्था हेर्दा कुन बेला भवन नै ढल्ने हो वा कुन बेला भित्ता फोडेर कैदी भाग्ने भन्ने चिन्ताले राम्रोसँग सुत्न समेत नपाइरहेको कारागारका कर्मचारी र सुरक्षाकर्मी बताउँछन् ।
कारागारको अनुगमन गर्दै प्रदेश सभा सदस्य महेश प्रसाद यादवले कारागारको सुधारका लागि केन्द्रदेखि प्रदेश सरकार समेतले ध्यान दिनुपर्ने बताए । उनले यसका लागि आफुले पनि सक्दो पहल गर्ने बताए ।
अर्का प्रदेश सभा सदस्य सतिश सिंहले कारागारमा जग्गा अतिक्रमण लगायत अन्य विभिन्न समस्याहरु आफुले जानकारी पाएको बताउँदै कैदीबन्दीहरुले भोग्नु परिरहेको समस्या तत्कालै समाधान हुनुपर्नेमा जोड दिए ।
