राजविराज । नेपाली कांग्रेसको विद्यार्थी संगठन नेपाल विद्यार्थी संघ (नेवि संघ) को सप्तरीे अध्यक्षको जिम्मेबारी राकेश कुमार ठाकुरले पाएका छन् ।
नेवि संघका केन्द्रीय अध्यक्ष टुजाङ शेर्पाले ठाकुरलाई नेवि संघ सप्तरी जिल्ला अध्यक्षको जिम्मेबारी दिएका हुन् ।
नेपाल विद्यार्थी संघ सप्तरीको नेतृत्व रिक्त रहेको र ३२ वर्ष उमेर हद पनि आकर्षित भएकाले संगठनलाई चलायमान बनाउन हाललाई नेपाल विद्यार्थी संघको विधान २०२७ को छैठौं संशोधन २०७५ बमोजिम तीन महिनाभित्र जिल्ला अधिवेशन सम्पन्न गर्ने गरि नेपाल विद्यार्थी संघ सप्तरी जिल्लाको अध्यक्ष पदमा ठाकुरलाई जिम्मेवारी दिइएको अध्यक्ष शेर्पाले दिएको पत्रमा उल्लेख गरिएको छ ।
अध्यक्ष शेर्पाले ठाकुरलाई नेवि संघको जिल्ला अध्यक्ष बनाउँदै नेपाल विद्यार्थी संघको विधि विधान र मर्यादा भित्र रहेर संघलाई गतिशिल बनाउने विश्वास व्यक्त गरेका छन् ।
‘तपाईको मनोनयनले संघलाई थप उचाई प्राप्त गर्ने विश्वास लिइएको छ’ पत्रमा भनिएको छ, ‘ कार्यकाल सफलताको शुभकामना छ ।’
