मधेश सम्वाददाता
राजविराज, २८ पुस ।
गाउँमै पञ्चायती मार्फत् मिलाउन खोजिएको बलात्कार घट्नाका दोषीलाई सप्तरी जिल्ला अदालतले कैद तोक्दै पििडत परिवारलाई क्षतिपूर्ती उपलब्ध गराउन आदेश दिएको छ ।
सप्तरीको डाक्नेश्वरी नगरपालिका वडा नम्बर ७ की १८ बर्षीया युवतीको २९ भदौ २०७७ मा सामूहिक बलात्कार भएको थियो । बलात्कार घट्नालाई गाउँमै मिलाउन खोज्दा पीडित युवतीले झुण्डिएर आत्महत्या गरेकी थिइन् ।
उक्त बलात्कार घट्नामा संलग्नलाई कैद सजाय तोक्ने फैसला बिहीबार अदालतले गरेको छ । यसअघि अदालतले पंचायतीमा संलग्न व्यक्तिहरुलाई कैद तोकिसकेको छ ।
सामुहिक जबरजस्ती करणी गर्ने मुख्य प्रतिवादी बब्लु मण्डल र रंजित मण्डललाई जनही १३ बर्ष कैद र उनीहरुबाट पीडित परिवारलाई जनही रु एक÷एक लाख क्षतिपुर्ती वापत भराउने आदेश अदालतले दिएको श्रेष्तेदार कुमार मास्केले जानकारी दिए ।
जिल्ला अदालतका मुख्य न्यायाधीश हेमन्त रावलको इजलासले सोही घटनामा मतियार रहेका धर्मानन्द मण्डललाई मुख्य प्रतिवादीलाई भएको कैद सजायको आधा ६ वर्ष ६ महिना कैद र रु एक लाख रुपैया पीडित परिबारलाई क्षतिपुर्ती भराउने फैसला सुनाएको छ । उक्त घट्नामा संलग्न मतियार भई हालसम्म फरार रहेका बिष्णु मण्डलको हकमा उनी पछि पक्राउ परेका बखत मुद्दा जगाउने गरि हाल मुल्तबीमा राखिएको मास्केले जानकारी दिए ।
पञ्चायत बसेर गाउँमै मुद्धा मिलाउन खोज्ने प्रतिबादी शत्रुघन मण्डल र उजित मण्डललाई यस अघि १८ पुसमा अदालतले मुख्य प्रतिबादीको हकमा कसुर ठहर सम्बन्धी निर्णय हुँदा नै जनही एक÷एक बर्ष कैद र रु २५ हजारका दरले जरिवाना गर्ने निर्णय सुनाइसकेको छ । पञ्चायतमा बसी निर्णयमा समर्थन गर्ने अन्य प्रतिबादीहरुलाई जनही २०÷२० हजार जरिबाना र जनही २५ हजार क्षतिपुर्ती भराउने गरि मुख्य प्रतिबादीको कसुर ठहर गर्दा नै सजाय ठहर गरि सकिएको छ ।
जबरजस्तीको घटना पछि गाउँमा पन्चायत बसी पीडित परिवारलाई रु २५ हजार दिएर मुद्दा मिलाउन गाउँकै अगुवाहरुले दबाब दिएका थिए । गाउँमा नमिले सामाजिक बहिस्कार गर्ने धम्की दिएपछी पीडितले भोलिपल्ट ३० भदौमा आफ्नै घरको बलेसीमा झुण्डिएर आत्महत्या गरेकी थिइन ।
एकल महिला रहेकी उनकी आमाले छिमेकीको जग्गा भाडामा लिएर धान खेती गरेको र सोही खेतमा घाँस काटन गएको बेला युवतीलाई प्रतिबादीहरुले सामूहिक बलात्कार गरेका थिए ।
