मधेश सम्वाददाता
राजविराज, २८ पुस ।
सप्तरीमा पण्डित, पुरोहित, मौलाना र प्रहरीबीच बालविवाह बिषयमा कानुनी प्रावधान बिषयक अन्तरक्रिया कार्यक्रम बिहीबार सम्पन्न भएको छ ।
बालविवाह विरूद्ध प्रदेश स्तरीय संजाल, परिकल्पना नेपाल तथा जिल्ला प्रहरी कार्यालयको संयुक्त आयोजनामा यो अन्तरकृया कार्यक्रमको आयोजना गरिएको हो । कार्यक्रममा पण्डित, पुरोहित, मौलानाले बालविवाह नगराउने प्रतिबद्धता जनाएका छन् ।
कार्यक्रममा बोल्दै प्रमुख जिल्ला अधिकारी भूपेन्द्र थापाले कसैले विवाह गर्दा या गराउँदा कानुनमा भएको कुरा आफूलाई थाहा थिएन भनेर पन्छिन नपाइने बताए । उनले बालविवाह गराउनेलाई दण्डको हकदार हुनुपर्ने भन्दै यसतर्फ सचेत हुनुपर्ने बताए ।
थापाले अहिले पनि समाजमा अन्धविश्वास कायमै रहेकोले धार्मिक विश्वास, अन्धविश्वास हटाउन पण्डित, मौलानाले महत्वपूर्ण भूमिका खेल्नुपर्ने बताए ।
कार्यक्रममा सप्तरीका प्रहरी प्रमुख अबिनारायण काफ्लेले बालबालिकाहरूलाई कुलतमा लाग्न नदिन शुरूमा अभिभावक सचेत हुनुपर्ने बताए । उमेर बढाउने जनप्रतिनिधिहरू पनि जिल्लामा कानुनी सजाय भोगिरहेको भन्दै उनले यस्ता घटना नदोहो¥याउन आग्रह गरे ।
कार्यक्रममा सामुदायिक सेवा केन्द्रका अध्यक्ष हितनारायण लाल दासले बालविवाह न्युनीकरण गर्न जटिल भएपनि न्युनीकरण गर्न जरुरी रहेको बताए ।
कार्यक्रममा पण्डित श्यामसुन्दर झाले पण्डितलाई विवाहमा विधि पुर्याउन बोलाउने हुनाले बेहुला बेहुलीको उमेर थाहा नहुने बताए । उनले समाजमा बालविवाह अहिलेपनि अभिश्राप रहेकोले यसलाई जरैबाट उखेल्न आवश्यक रहेको बताए ।
पण्डित कमलकान्त झाले सरकारले राज्यबाटदिने सुविधाबाट बन्चित नगरेसम्म बालविवाह न्युनीकरण नहुने बताए ।
कार्यक्रममा राजविराज नगरपालिका वडा नं १ का वडा सदस्य खेलानन्द यादव, पण्डित नितान्त झा, मौलाना मो. तेईस लगायतले बालविवाह न्यूनकरणको सन्दर्भमा धारणा राखेका थिए ।
परिकल्पना नेपालका अध्यक्ष सुधा देवले उद्देश्यबारे जानकारी गराएको कार्यक्रममा सह सचिव पिंकी मण्डलले संचालन गरेकी थिईन् भने स्वागत मन्तव्य सवाना प्रबिणले दिएकी थिईन् ।
