८ मंसिर, राजविराज । सप्तरीको ४ प्रतिनिधीसभा क्षेत्रमध्ये ३ क्षेत्रको अन्तिम परिणाम सार्वजनिक भएको छ । बिहीबार साँझसम्म सार्वजनिक भएको परिणाम अनुसार नेपाली कांग्रेस, जनमत र जनता समाजवादी पार्टी (जसपा) ले १÷१ क्षेत्रमा विजयी हासिल गरेको छ ।
क्षेत्र नम्बर १ मा जसपाका उम्मेदबार नवलकिशोर साह विजयी भएका छन् । २३ हजार ५६४ मतसहित उनी निर्वाचित भएका हुन् । उनका निकटतम प्रतिद्धन्द्धी जनमत पार्टीका उम्मेदबार जयकान्त राउतले १९ हजार ९९२ मत प्राप्त गरे । नेपाली कांग्रेसका उम्मेदबार रामदेव साह १४ हजार ३१२ मतसहित तेस्रो स्थानमा रहे । साह कांग्रेसका जिल्ला सभापति समेत हुन् ।
निर्वाचित साह यसअघि सप्तरी क्षेत्र नम्बर १ को ख बाट प्रदेश सभामा निर्वाचित भई मधेश प्रदेश सरकारको सामाजिक विकास मन्त्री समेत बनेका थिए ।
क्षेत्र नम्बर ३ मा नेपाली कांग्रेसका उम्मेदबार दिनेश यादव निर्वाचित भएका छन् । २६ हजार १६६ मत ल्याएर उनी निर्वाचित भएका हुन् । उनका निकटतम प्रतिद्धन्द्धी नेकपा एमालेका उम्मेदबार ताराकान्त चौधरीले २२ हजार ३०० मत प्राप्त गरे । जनमत पार्टीका अनिस अन्सारीले १५ हजार ११४ मत प्राप्त गरे । पराजित भएका चौधरी नेकपा एमालेका जिल्ला अध्यक्ष समेत हुन् ।
निर्वाचित भएका यादव भने यसअघि लगातार ३ वटा निर्वाचनमा प्रतिस्पर्धा गरेपनि पराजित भएका थिए । २०६४ सालमा भएको पहिलो संविधानसभा, २०७० सालमा भएको दोस्रो संविधानसभा र २०७४ को प्रतिनिधी सभामा प्रतिस्पर्धा गर्दा पनि उनी जित्न सकेका थिएनन् ।
यसअघि क्षेत्र नम्बर २ मा जनमत पार्टीका अध्यक्ष समेत रहेका डा. सिके राउत निर्वाचित भएका छन् । ३५ हजार ४२ मत ल्याएर राउत निर्वाचित भएका हुन् । उनका निकटतम प्रतिस्पर्धी जसपा अध्यक्ष उपेन्द्र यादवले १६ हजार ९७९ मत ल्याए । लोसपा उम्मेदबार जयप्रकाश ठाकुर ७ हजार ३४७ मत प्राप्त गरे ।
क्षेत्र नम्बर ४ को मतगणना जारी नै रहेको छ । पछिल्लो परिणाम अनुसार नेपाली कांग्रेसका तेजुलाल चौधरी अगाडि छन् । ७ हजार ७६१ मत ल्याएर चौधरीले अग्रता बनाइरहँदा जसपाका उम्मेदबार बालकिशोर यादव ५ हजार ९६९ मतसहित दोस्रो र जनमत पार्टीका उम्मेदबार सुकदेव साह ५ हजार ८५० मतसहित तेस्रो स्थानमा छन् ।
