मधेश सम्वाददाता
राजविराज, २५ माघ ।
कोशी नदीको बीचमा रहेको सप्तरीको गोबरगाढा गाउँमा भारतीयहरु आएर गोली चलाएका छन् । गोली लागेर स्थानीय एक व्यक्ति घाइते भएका छन् ।
जिल्लाको हनुमाननगर कंकालिनी नगरपालिका वडा नम्बर १३ स्थित गोबरगाढामा बुधबार साँझ झण्डै तीन दर्जनको संख्यामा आएका भारतीयहरुले गाउँलेलाई कुटपिट गर्दै गोली समेत चलाएको स्थानीयले बताएका छन् ।
गोलीको छर्रा लागेर स्थानीय ६५ बर्षीय महेन्द्र पासवान घाइते भएका छन् । घुँडाम छर्रा लागेका उनलाई उपचारका लागि हनुमाननगरतर्फ ल्याइएको प्रहरीले जनाएको छ ।
भारतीय सीमासँग जोडिएको गोबरगाढाका बासिन्दाको केहि दिन यता गाई भैंसी चोरी हुन थालेका थिए । त्यहीं चोरीको घट्नामा संलग्न रहेको भन्दै गोबरगाढाबासीले एक जना भारतीयलाई नियन्त्रणमा लिएपछि ठूलो संख्यामा आएका भारतीयले गाउँलेलाई कुटपिट गरेका हुन् । उनीहरुले ६ राउण्ड जति गोली पनि फायर गरेको प्रहरी श्रोतको भनाई छ ।
घट्नास्थल पुग्न एक दर्जन भंगालो पार गर्नुपर्ने हुन्छ । घट्नास्थलतर्फ नेपाल तथा सशस्त्र प्रहरीको टोली पुगेको र यस बिषयमा थप अनुसन्धान गर्ने कार्य भइरहेको जिल्ला प्रहरी कार्यालय, सप्तरीका प्रबक्ता एवं डीएसपी नरेश कुमार सिंहले जानकारी दिए ।
