राजविराज । लोकतान्त्रिक समाजवादी पार्टी (लोसपा) नेपाल, सप्तरीले गाउँब्लक, बिटौरी, मिनही, जिरायतसहितको जग्गामा बसोबास गर्दै आएकालाई जग्गाधनी प्रमाण पुर्जाको ब्यबस्था मिलाउन माग गरेको छ ।
लोसपाले ती जग्गाहरुको नाप जाँच ऐन २०१९ र नेपाल राजपत्र २०७५ मा प्रकाशित सूचना अनुसार नाप नक्शा भई कानुन अनुसार ७ दिने र २१ दिने सूचना प्रकाशित भएपनि उक्त जग्गाहरु दर्तातर्फ उचित ध्यान नदिएकाले नापी कार्यालयको ध्यानाकर्षण गराएको छ ।
पार्टीका जिल्ला अध्यक्ष सुनिल कुमार झाको नेतृत्वमा गएको नेताहरुले टोलीले नापी शाखा प्रमुख शत्रुद्यन प्रसाद यादवलाई ज्ञापन पत्र बुझाउँदै उक्त माग गरेका छन् ।
जिल्लाभरि गाउँ ब्लक, बिटौरी, बाल बिटौरी, मिनही, जिरायत समेतका जग्गाहरु नापी भई सम्पूर्ण कार्यहरु सम्पन्न भएपनि हालसम्म दर्ता गर्नेतर्फ कुनै प्रक्रियाबारे सूचना नभएको जनाउँदै ज्ञापनमा यसतर्फ अविलम्ब ध्यान दिई कानुनी प्रक्रिया पुरा गराई जनतालाई धनी प्रमाण पूर्जा उपलब्ध गराउन माग गरिएको छ ।
