मनोज मोरबैता
जनकपुरधाम । जनकपुर रेल्वे स्टेशनमा एक महिलाको साथमा रहेको रकम लुटिएको छ ।
धनुषाको जनकनन्दनी गाउँपालिका वडा नम्बर ६ कठालकी सुनिताकुमारी यादवको साथमा रहेको रु २ लाख ७० हजार लुटिएको हो ।
घर जानका लागि रेलमा चढ्नैबित्तिकै आफूले बोकेको ह्याण्ड ब्याग गायब भएको सुनिताले बताइन् । उनले त्यहीं व्यागमा उक्त रकम र रु १० हजार बराबरको सुनको गहना राखेको बताइन् ।
जनकपुरधामस्थित एनआईसी एसिया बैंकबाट रकम झिकेर घर जाने क्रममा रेल्वे स्टेशनमा रकम र गहना भएको व्याग लुटिएको उनले बताइन् ।
गाउँमा जग्गा खरीद गरेकी उनले त्यस वापत जग्गाधनीलाई रकम दिन बैंकबाट रकम झिकेको बताइन् । ‘जग्गा खरीद गरेपछि रकम तिर्नुथ्यो’ उनले भनिन्, ‘त्यसैका लागि बैंकबाट रकम झिकेर घरतर्फ गइरहेकी थिएँ । रेलमा चढ्नेवित्तिकै व्याग गायव भयो ।’
सुनिताका पति सञ्जु यादव वैदेशिक रोजगारीका लागि खाडी मुलुकमा छन् ।
