राजविराज । सरकारले घोषणा गरी शिलान्यास गर्दा समेत रामराजा स्वास्थ्य विज्ञान प्रतिष्ठान निर्माणतर्फ कुनै तदारुकता नदेखाएको भन्दै सप्तरी युथ नेपालले अर्काे चरणको आन्दोलन घोषणा गरेको छ ।
प्रतिष्ठान निर्माणको माग गर्दै यसअघि एक हप्ते बिभिन्न दवावमूलक आन्दोलन गरेको सप्तरी युथ नेपालले अर्काे चरणमा हस्ताक्षर संकलन गर्ने भएको छ ।
युथ नेपालले मंगलबार नेपाल पत्रकार महासंघ, सप्तरीमा पत्रकार सम्मेलन आयोजना गरी आन्दोलनको कार्यक्रमबारे जानकारी गराएको हो । ‘हामी बुधबारदेखि २३ गतेसम्म हस्ताक्षर संकलनलाई निरन्तरता दिन्छौं’ युथ नेपालको आन्दोलन परिचालन समितिका संयोजक सत्येन्द्र यादवले भने, ‘यो कार्यक्रममा सबैले सहयोग गर्नेमा आशावादी छौं ।’
सप्तरी युथ नेपालका कार्यबाहक अध्यक्ष मोहन कुमार यादवले नेपाल सरकारले जिल्लामा रामराजा स्वास्थ्य विज्ञान प्रतिष्ठान निर्माण गर्ने घोषणा गर्दै तत्कालिन प्रधानमन्त्री केपी शर्मा ओलीले राजविराज नगरपालिका १० बिरौलमा भर्चुअल माध्यमबाट प्रतिष्ठानको शिलान्यास गरेपछि सप्तरीबासी उत्साहित भएपनि अहिले निराश भएकाले आफूहरु आन्दोलनमा उत्रेको बताए ।
उनले हस्ताक्षर संकलनपछि प्रधानमन्त्रीलाई बुझाइने र यसपछि पनि ध्यान नदिए बैठक बसेर अर्काे आन्दोलनको कार्यक्रम सार्वजनिक गर्ने बताए । ‘प्रतिष्ठान निर्माण नभएसम्म आफूहरु आन्दोलनमा लागिरहन्छौं’ उनले भने ।
पत्रकार सम्मेलनमा युथ नेपालले गत कात्तिकमा आयोजना गरेको सप्तरी महोत्सवको आयव्यय समेत सार्वजनिक गरेको थियो ।
