राजविराज । सप्तरीको खडक नगरपालिका मधेश प्रदेशमै दोश्रो बालविवाह मुक्त पालिका बनेको छ ।
शुक्रबार एक भव्य समारोहकाबीच नगरपालिकालाई बालविवाह मुक्त घोषणा गरिएको छ । मधेश प्रदेश सरकारका शिक्षा तथा संस्कृति मन्त्री महेश यादवले बालविवाह मुक्त घाेषणा गरे ।
त्यस अवसरमा बोल्दै उनले मधेश प्रदेश सरकारको १० बर्षको रणनीति नै बालविवाह मुक्तको अवधारणा रहेको बताए । उनले सरकारको रणनीतिमा सहयोग गरेकोमा धन्यवाद दिए ।
शिक्षामा मधेश प्रदेश सवै प्रदेशभन्दा कमजोर रहेको उनले बताए । आगामी ४ बर्षभित्रमा प्रदेशका कुनै पनि ब्यक्ति निरक्षर नरहने गरि सरकारले काम गरिरहेको बताए । सीमान्तकृत, गरीब, दलित सबै साक्षर हुने उनले बताए ।
अभिभावक र शिक्षकले आफ्नो दायित्व बुझेर काम गरे शिक्षा मजबुत हुने उनले बताए ।
उनले बालविवाह मुक्त घोषणा गरेकोमा नगरपालिकालाई धन्यवाद दिदै पालिकालाई साक्षर घोषणा गर्न पनि आग्रह गरे । ‘यसमा हामी पनि सहयोग गर्छौ’ उनले भने ।
जिल्ला समन्वय समितिका प्रमुख शिबनारायण साहले बालविवाह मुक्त भएपछि यसको कार्यान्वयनमा जोड दिए ।
सुरुङा नगरपालिकाका प्रमुख गीता चौधरीले घोषणा गरेपछि अझ कठिनाइ हुने बताइन । हामी १ बर्ष नै घोषणा गर्दा निकै चुनौती खेपिरहेको बताउँदै उनले बालबालिकाले दिने बालविवाह सम्बधी सूचना गम्भीर तरिकाले बुझ्नुपर्ने बताइन ।
कतिपय अभिभावक जन्म मिति घटाउन आउने गरेको बताउँदै उनले जनप्रतिनिधि यसतर्फ चनाखो रहनुपर्ने बताइन् । ‘घाेषणा गरेर मात्र हुँदैन् यसमा निगरानी राखिरहनुपर्छ’ उनले भनिन् ।
नगरपालिकाका प्रमुख जयप्रकाश चौधरीको अध्यक्षतामा आयोजित कार्यक्रममा सेभ द चिल्ड्रेन बर्दिवासका प्रमुख धना भुसाल, नेपाल पत्रकार महासंघ, सप्तरीका अध्यक्ष श्रवणकुमार देव, खडक नपा १० का अध्यक्ष राजेन्द्र चौधरी, सबल नेपालका अध्यक्ष जुना गिरी, भसराज उमाविका प्रधानाध्यापक सुर्यनरायण साह, बाल क्लब संजालकी मंजुला साहसगितकाले शुभकामना मन्तव्य ब्यक्त गरेका थिए ।
बालविवाह मुक्त घोषणामा सहयोग गरेको भन्दै सेभ द चिल्ड्रेन राजविराज र महोत्तरी, सबल नेपाल राजविराजलाई कदर पत्र प्रदान गरिएको थियो ।
सबल नेपाल राजविराज र सेभ द चिल्ड्रेनको सहयोग र सहकार्यमा बालविवाह मुक्त अभियान संचालन निर्देशिका २०७९ बमोजिम यो घोषणा गरिएको नगरपालिकाले जनाएको छ ।
मधेश प्रदेशमा पहिलो पटक सप्तरीकै सुरुङा नगरपालिका गत बर्ष बालविवाह मुक्त घोषणा भएको थियो ।
