राजविराज । सडक निर्माणमा व्याप्क लापर्वाही गरेको भन्दै शुक्रबार सप्तरीको छिन्नमस्ता गाउँपालिकामा प्रदर्शन गरिएको छ ।
राजविराज–छिन्नमस्ता सडक खण्डको निर्माण गर्ने जिम्मेबारी लिएको कम्पनीले जथाभावी तरिकाले खनेर तथा ग्राभेल थुपारेपछि हिंडडुल गर्न समेत समस्या भइरहेको भन्दै स्थानीयले प्रदर्शन गरेका हुन् ।
स्थानीय विद्यालयका बालबालिका र अगुवाहरुले ‘हिंड्ने बाटो सुगम होस्, हाम्रो अधिकार सुरक्षित गर’ जस्ता नारा लगाउँदै प्रदर्शन गरेका हुन् ।
सडक निर्माणको ठेक्का लिएको साह निर्माण कम्पनीले लापर्वाहीपूर्ण तरिकाले काम गरेपछि आन्दोलित बन्नुपरेको स्थानीय अगुवा जयप्रकाश यादवले बताए । उनले बाटो खनेर राखिदिँदा अनि ग्राभेल पनि जथाभावी तरिकाले सडकमै राखिदिँदा पैदल हिंडन समेत समस्या भइरहेको बताए ।
दुई दिनअघिको पानीका कारण सबारी चलाउन समेत समस्या भएको र कतिपय मोटरसाइकल चिप्लेर दुर्घटना नै भएको उनले सुनाए । ‘अहिले हिंडन सक्ने अवस्था नै छैन्’ उनले भने, ‘सम्बन्धित निकायलाई भन्दा पनि कसैले चासो लिएको छैन् ।’
सडक डिभिजन कार्यालय मार्फत् साह निर्माण्(ा कम्पनीले यो सडक बनाउने ठेक्का पाएको छ । तर निर्माण कम्पनीका कुनै व्यक्ति पनि सम्पर्कमा छैनन् । निर्माण कम्पनीका प्रमुख संजीब साहसँग सम्पर्क गर्न खोज्दा उनले फोन नै उठाएनन् ।
