हनुमाननगरमा पशु अस्पताल निर्माण हुने

राजविराज । सप्तरीको हनुमाननगर कंकालिनी नगरपालिकामा पशु अस्पताल निर्माण हुने भएको छ ।

नगरपालिकाको वडा नम्बर ५ योगिनियाँमा यो अस्पताल निर्माण हुने भएको हो । निर्माण हुने अस्पताल भवनको गत शनिबार नै शिलान्यास गरिएको छ । राष्ट्रिय योजना आयोगका पुर्व सदस्य डा. जयकान्त राउतले शिलान्यास गरे ।

रु ५९ करोड १ लाख १३३ मा कन्चन कन्स्ट्रक्सन कम्पनी सातदोबाटो ललितपुरले यो भवन बनाउने ठेक्का लिएको छ ।

चार तल्ले ३५ कोठे भवनमा पशु सम्बन्धी हरेक रोगको उपचार गर्ने लक्ष्य राखिएको नगरपालिकाका प्रमुख बिरेन्द्र माझीले जानकारी दिए ।

उनका अनुसार समपूरक योजना अन्तर्गत ५० प्रतिशत संघीय सरकारले र ५० प्रतिशत बजेट नगरपालिकाले व्यहोर्नेछ ।

पशु अस्पताल भवनको निर्माण कार्य २०८२ साल फागुन मसान्तसम्म सम्पन्न गर्ने लक्ष्य लिइएको छ ।