राजविराज । सप्तरीको डाक्नेश्वरी नगरपालिकामा शनिबार हाेली मिलन समारोहकाे आयोजना गरिएको छ ।
जनता समाजवादी पार्टी (जसपा) डाक्नेश्वरी नगरपालिका वडा नम्बर ६ समितिले आयोजना गरेको होली मिलन समारोहमा एकले अर्कालाई अविर लगाइदिएर शुभकामना आदान प्रदान गरिएको छ ।
होली सम्बन्धी पौराणिक गीत र नृत्य समेत प्रस्तुत गरिएको कार्यक्रममा जसपाका विभिन्न तहका नेताहरूको सहभागिता थियो ।
कार्यक्रमका प्रमुख अतिथि जसपा नेता एवं राष्ट्रिय सभा सदस्य मृगेन्द्र सिंह यादवले असत्यमाथी सत्यको विजय भएको खुशियालीमा मनाउँदै आएको यो पर्व भाइचाराको पर्व समेत भएको बताए ।
उनले सभ्य र भव्य रूपमा याे पर्व मनाउदै एकले अर्कालाई शुभकामना दिएर आफ्नो संस्कृतिको जगेर्ना गर्नुपर्ने बताए ।
पूर्व प्रदेश सांसद विदेश्वर यादव ‘विक्की’ ले आपसी भाइचाराकाे प्रतीकको रुपमा रहेको यो पर्व महत्त्वपूर्ण रहेको बताए ।
उनले जतिसुकै मनमुटाव भएपनि एकअर्कासँग अंकमाल गरेर शुभकामना दिने गरिएको बताउँदै आपसी भाइचारा कायम गर्न सबैसँग अनुरोध गरे ।
आपसी भाइचारा निर्माण भए राम्रो समाज बन्ने र यसो हुँदा विकासीय काम पनि अघि बढ्ने बताए ।
अहिले समाजमा भाइचारा कमजोर बन्न लागेकोप्रति चिन्ता व्यक्त गर्दै उनले यसप्रति सबैले ध्यान दिनुपर्ने बताए ।
कार्यक्रममा स्थानीय कलाकारले होली सम्बन्धी गीत एवं नृत्य समेत प्रस्तुत गरेका थिए ।
