यसअघि काठ किन्न बिभिन्न समस्या झेल्दै आएका सप्तरीबासीले अब सहजै काठ किन्न सक्ने भएका छन् ।
जिल्लामा नेपाल वन निगम लिमिटेड अन्तर्गत काठको बिक्री डिपो स्थापना भएको छ । यो डिपो मार्फत् अब सुपथ मूल्यमा काठ खरीद गर्न सकिने भएको हो ।
स्थापना भएको डिपोको वन तथा वातावरण मन्त्री नवलकिशोर साहले एक कार्यक्रमकाबीच उद्घाटन गरे ।
त्यस अवसरमा बोल्दै मन्त्री साहले यसअघि बिभिन्न ठाउँबाट काठ खरीद गरेर ल्याउनुपर्ने बाध्यता भएपनि अब यो बाध्यताको अन्त्य भएको बताए । उनले सप्तरीबासीले यो डिपो मार्फत् सहज तरिकाले चिरान काठ पाउने विश्वास व्यक्त गरे ।
डिभिजन वन कार्यालय, सप्तरीका प्रमुख सुभाष दासले यसअघि निवेदन दिँदा पनि काठ दिन समस्या भइरहेको बताउँदै अब सुपथ मूल्यमा काठ उलब्ध गराउने बताए ।
उनले सालको काठ प्रति क्यूबिकफिट भ्याटबाहेक रु ३ हजार ८५० मा उपलब्ध गराइने जानकारी गराए ।
