राजविराज । महिला, बालबालिका तथा ज्येष्ठ नागरिक मन्त्री नवलकिशोर साहले आफ्ना चेलीको दिर्घायुको अपेक्षा राख्नेले बालविवाह गर्न नहुने बताएका छन् ।
बालविवाह, उमेर नपुगी हुने विवाह तथा जर्वजस्ती हुने विवाह रोकथामका लागि सरोकारबालासँग मंगलबार राजविराजमा आयोजित अन्तरकृया कार्यक्रमलाई सम्बोधन गर्दै मन्त्री साहले उक्त कुरा बताएका हुन् ।
उनले दिर्घायुको आशिर्वाद दिएर मात्र नहुने र त्यसका निम्ति उमेर पुगेपछि मात्रै बिवाह गर्नुपर्नेमा जोड् दिए । बालविवाहले बाल तथा महिला मृत्युदर बढ्ने गरेको बताउँदै उनले सानै उमेरमा बिवाह गर्नु करीति भएको बताए ।
यो कुरीतिलाई अन्त्य गर्नका लागि पालिका प्रमुख, उपप्रमुख, वडाअध्यक्षसहित स्थानीय जनप्रतिनिधीलाई अघि बढ्नुपर्ने मन्त्री साहको भनाई छ ।
‘सानै उमेरमा छोरीको बिवाह नगरे बिग्रिने गलत सोंच छ’ मन्त्री साहले भने, ‘यस्तो सोंच राख्नुहुँदैन् । छोरीलाई शिक्षा र संस्कार दिए कोहि पनि बिग्रिदैन् ।’
बालविवाहसँगै दाइजो प्रथालाई समेत हटाउनुपर्ने उनले बताए । ‘बालबिवाह र दाइजोप्रथा अन्त्यका लागि स्थानीय जनप्रतिनिधी अघि बढ्नुस, हामी पनि सहयोग ग¥छौं’ उनले भने ।
सेभ द चिल्ड्रेनको सहयोगमा राष्ट्रिय बालअधिकार परिषद्ले आयोजना गरेको कार्यक्रममा जिल्ला समन्वय समितिका प्रमुख शिबनारायण साहसहित सरोकारबालाले बालबिवाह न्यूनिकरणमा जोड् दिएका थिए ।
