राजविराज । स्वास्थ्य तथा जनसंख्या मन्त्री प्रदीप पौडेलले अस्पताल विकास समितिको आम्दानी पारदर्शी बनाउनुपर्नेमा जोड् दिएका छन् ।
राजविराजस्थित गजेन्द्रनारायण सिंह अस्पतालको मंगलबार अनुगमन तथा निरीक्षण गर्दै मन्त्री पौडेलले यस्तो बताएका हुन् । अस्पताल विकास समितिको आम्दानी अपारदर्शी भइरहेको भन्दै उनले पारदर्शी बनाउन निर्देशन दिए ।
मन्त्री पौडेलले अस्पतालजस्तो ठाउँमा गोजीबाट झिकेर कर्मचारी नियुक्त नगर्न समेत सचेत गराए । ‘गोजीबाट झिकेर नियुक्त नगर्नुस्, अन्तर्वार्ता लिएर प्रकृया पूरा गरी मात्रै नियुक्त गर्नुस्’ उनले भने ।
गजेन्द्रनारायण सिंह अस्पतालमा दरबन्दी भई बाहिर काजमा गएका चिकित्सकलाई फर्काइने उनले बताए ।
दरबन्दी अनुसारको चिकित्सक तथा स्वास्थ्यकर्मी यो अस्पतालमा छैन् । तर, दरबन्दीमा काम गरिरहेका केहि चिकित्सक भने अन्यत्रको अस्पतालमा काजमा खटिरहेका छन् ।
मन्त्री पौडेलले बाहिर काजमा खटिएकालाई यो अस्पतालमा पठाइदिने बताए । उनले यो अस्पतालमा न्यूनतम आवश्यक्ता अनुसार जनशक्ति समेत थप्ने विश्वास दिलाए ।
मन्त्री पौडेलले अस्पतालको फार्मेसीमा सबै औषधि रहनुपर्ने बताए । ‘अस्पतालको फार्मेसीमा औषधि छैन भन्न मिल्दैन्’ उनले भने, ‘छैन भने गैर कानुनी हुन्छ । दण्डको भागिदारी बन्नुपर्छ ।’
उनले अस्पतालमा एमआरआई, सिटी स्क्यान जस्ता उपकरण बिग्रियो भन्न पनि नपाइने बताए । ‘बिग्रेमा अस्पतालकै दररेटमा बाहिर यस्तो सेवा उपलब्ध गराउनुपर्छ’ उनले भने ।
