राजविराज । स्वास्थ्य सेवालाई प्रभावकारी बनाउन र गुणस्तरीय बनाउनका निम्ति सप्तरीका राजनीतिक दल एक ठाउँमा उभिएका छन् ।
जिल्लाका प्रमुख ८ राजनीतिक दल गजेन्द्रनारायण सिंह अस्पताललाई सुधार गर्न र रामराजा स्वास्थ्य विज्ञान प्रतिष्ठानको कामलाई अघि बढाउन एकबद्ध भएका छन् । ती दलका जिल्ला अध्यक्षहरुले मंगलबार जिल्ला आएका स्वास्थ्य तथा जनसंख्या मन्त्री प्रदीप पौडेललाई यी बिषयमा ज्ञापन बुझाएका छन् ।
ज्ञापनमा रामराजा प्रसाद सिंह स्वास्थ्य विज्ञान प्रतिष्ठानको भौतिक पूर्वाधारको लागि यसै आर्थिक बर्षमा रु ५ अर्ब बजेट अबिलम्ब व्यवस्थापन गराइदिन, प्रतिष्ठानको कार्य प्रारम्भ हुनका लागि वातावरण प्रभाव मूल्यांकन सम्बन्धित मन्त्रालयबाट पास गराइदिन र प्रतिष्ठानको ऐन कानुन बनाई स्थायित्व प्रदान गरिदिन आग्रह गरिएको छ ।
यस्तै, गजेन्द्रनारायण सिंह अस्पतालमा दरबन्दीमा रहेका सम्पूर्ण विशेष चिकित्सकलाई अबिलम्ब काज फिर्ता गराई कामकाजामा लगाइदिन, अस्पताललाई ५०० शैय्याको अस्पतालको रुपमा स्तरन्नो ितगर्ने घोषाणालाई कार्यान्वयन गराईदिन पनि ज्ञापनमा आग्रह गरिएको छ ।
अस्पतालमा निर्माणाधीन रहेका अधुरा भौतिक पूर्वाधारहरु पटक–पटक म्याद थप्दा समेत सम्पन्न हुन नसकेकोले यसलाई अन्तिम पटक म्याद पुस मसान्तसम्म रहेकाले सोही समयमा सम्पन्न गराईदिन पनि दलका नेताहरुले स्वास्थ्य मन्त्री पौडेलसँग आग्रह गरे ।
नेपाली कांग्रेसका सभापति रामदेव साह, नेकपा एमालेका जिल्ला सचिव देबनाथ यादव, नेकपा माओवादी केन्द्रका केन्द्रीय सदस्य अशोक मण्डल, जसपा नेपालका जिल्ला अध्यक्ष केदार यादव, नेकपा एकीकृत समाजवादीका अध्यक्ष प्रतापनारायण चौधरी, राष्ट्रिय प्रजातन्त्र पार्टीका अध्यक्ष उम्देश्वर प्रसाद साह, जनमत पार्टीका जिल्ला इन्चार्ज रामगमन साह र लोसपाका जिल्ला अध्यक्ष सुनिल झाको हस्ताक्षर रहेको ज्ञापन माओवादीका केन्द्रीय सदस्य मण्डलले स्वास्थ्य मन्त्रीलाई बुझाए ।
ज्ञापन बुझ्दै मन्त्री पौडेलले मागहरु सकारात्मक रहेको बताउँदै एकैपटक पूरा गर्न नसकिएपनि क्रमशः पूरा गर्ने प्रतिबद्धता जनाए ।
