राजविराज । प्रतिनिधी सभा सदस्य (संघीय सांसद) रन्जु झाले शिक्षा क्षेत्रमा क्रान्तिकारी परिवर्तनको आवश्यक्ता रहेको बताएकी छन् ।
सेभ द सप्तरीद्धारा संचालित समावेशी शिक्षाको लागि सामुदायिक संलग्नता परियोजनाको आईतबार आयोजित समीक्षा कार्यक्रमलाई सम्बोधन गर्दै उनले यस्तो बताएकी हुन् । सामुदायिक शिक्षा ओरालो लाग्दै गएकोप्रति चिन्ता व्यक्त गर्दै उनले देशको विकास शिक्षासँग जोडेर गर्नुपर्ने आवश्यक्ता औंल्याइन् ।
‘ठूलो भवन मात्र बनाइदिएर हुँदैन’ उनले भनिन्, ‘शिक्षालाई कसरी गुणस्तरीय बनाउने हो त्यसतर्फ ध्यान दिनुपर्ने आवश्यक्ता छ ।’
पछिल्लो समय शिक्षकको इमान्दारिता घट्दा सामुदायिक शिक्षा खस्किदैं गएको बताउँदै उनले भनिन्, ‘स्थानीय शिक्षक भएपछि यस्तो अवस्था आएको छ ।’
शिक्षालाई राम्रो बनाउन शिक्षकको जिलान्तर सरुवा गर्नुपर्ने धारणा उनले राखिन् । ‘म हुम्ला, जुम्ला भन्दिनँ । तर, सप्तरीको सिरहा र सिरहाका शिक्षकलाई सप्तरी सरुवा गर्नुपर्छ ।’
सरकारी शिक्षकलाई आफ्नै शिक्षणप्रति विश्वास नरहेको भन्दै उनले यहीं कारण आफ्नो बालबालिकालाई नीजि विद्यालयमा पढाउने गरेको उल्लेख गरिन । ‘पहिला सीडीओ, एसपीदेखि सबैका बालबालिका सामुदायिक विद्यालयमा पढ्थे’ उनले भनिन्, ‘अहिले नीजि विद्यालय रोजेपछि पनि यस्तो समस्या सृजित भएको छ ।’
आयोजक संस्था सेभ द सप्तरीका अध्यक्ष ध्रुब देवको अध्यक्षतामा भएको कार्यक्रममा जिल्ला समन्वय अधिकारी कुन्दन कर्ण, तिलाठी कोइलाडी गाउँपालिकाकी उपाध्यक्ष फुल कुमारी साहसहितकाले मन्तव्य व्यक्त गरेका थिए ।
