राजविराज । सप्तरी जिल्लाका प्रमुख जिल्ला अधिकारी (सीडीओ) भोला दाहालले जिल्लाका मुख्य सडक खण्डहरूको स्तरोन्नति कार्य तत्काल सम्पन्न गर्न सम्बन्धित निकायलाई कडा निर्देशन दिएका छन् ।
जिल्लाका मुख्य सडकहरु निर्माण गर्ने जिम्मेवारी लिएको निर्माण कम्पनीले पटक पटक म्याद लिएपनी सम्पन्न गर्न सकेको छैन । जसका कारण सर्वसाधारणलाई आवतजावतमा कठिनाइ भोग्नुपरेको छ ।
राजविराज-रुपनी, राजविराज-भारदह, राजविराज-छिन्नमस्तासहितका सडक लामो समयदेखि जिर्ण छ । सडक निर्माणको जिम्मा लिएका निर्माण कम्पनीको ढिलासुस्तीका कारण सडक अलपत्र छ ।
सीडीओ दाहालले लहान डिभिजन सडक कार्यालयका इन्जिनियर जीवत यादव, सुरेन्द्र दास, ठेकेदार कम्पनी शाह इन्जिनियरिङ कन्स्ट्रक्सनका प्रतिनिधि सुलभ पौडेल लगायतलाई बाेलाएर काम छिटो सम्पन्न गराउन निर्देशन दिएका हुन् ।
सीडीओ दाहालले सडक स्तरोन्नति, कालोपत्र र मर्मत कार्य तत्काल सम्पन्न गरी जनतालाई राहत दिन निर्देशन दिएकाे बताए ।
