राजविराज । सप्तरीको रुपनी गाउँपालिकास्थित औद्योगिक क्षेत्रमा आयोजना गरिएको श्री सीताराम नाम १००८ मण्डलीय सकिर्तन एवं श्री रामचरित्र मानस नौ दिवसीय महायज्ञस्थलमा आगलागी भएको छ ।
महायज्ञको समापन हुने दिन सोमबार साँझ आगलागी भएको हो । महायज्ञका लागि बनाइएको मुख्य मण्डपमा आगलागी भएको हो । मुख्य मण्डप आगलागीमा जलेर नष्ट भएको छ ।
हवन भइरहेको बेला एक्कासी आगलागी भएको प्रत्यक्षदर्शीले बताएका छन् । मण्डपसहित त्यहाँ राखिएका लत्ताकपडा, हवनका सामग्री जलेर नष्ट भएको छ ।
आगोलाई राजविराज नगरपालिकाबाट गएको बारुण यन्त्र तथा उपस्थित सर्वसाधारणको मद्दतमा निभाइएको थियो ।
यहाँ गत २१ बैशाखदेखि महायज्ञको आयोजना गरिएको थियो ।
औद्योगिक क्षेत्रको जमिनमा रहेको दोषबाट मुक्ति दिलाउन शुद्धीकरण स्वरुप समेत यो महायज्ञ आयोजना गरिएको थियो ।
महायज्ञमा एक हजार आठ मण्डपमा कीर्तन मण्डली, हनुमान आराधना मण्डली, वृन्दावनको रासलीला, रामलीला, रामचरित्र मानस पाठ, उच्चकोटी विद्वानद्वारा प्रवचन तथा विशाल भण्डारा समेतको व्यवस्थापन गरिएको थियो ।
यज्ञका अगुवा पगला बाबाका अनुसार २०५६ सालमा धनुषामा पहिलोपटक यस्तो महायज्ञ भएको थियोे । दोस्रो पटक सप्तरीमा आयोजना भएको उनले बताए ।
