राजविराज । सप्तरीको कंचनरुप नगरपालिका ८ स्थित आधारभूत विद्यालयमा दुई कोठे भवन निर्माणको मंगलबार शिलान्यास भयो । मधेश प्रदेश सरकार अन्तर्गत भौतिक पूर्वाधार विकास मन्त्रालयको बजेटबाट निर्माण हुने भवनको शिलान्यासमा भने जनमत पार्टीको व्यानर राखेको पाइएको छ ।
कुनै पनि शिलान्यास, उद्घाटन कार्यक्रमको व्यानरमा आयोजक अथवा उपभोक्ता समितिको नाम राखिएको हुन्छ । तर, यहाँ जनमत पार्टीका अध्यक्ष डा. सिके राउत, चुनाव चिन्ह लाउडस्पीकरको चित्र छापिएको व्यानर राखियो । त्यहीं व्यानरमा शिलान्यास कार्यक्रम उल्लेख गरिएको छ ।
भवनको शिलान्यास पार्टीका संगठन विभाग प्रमुख डा. जयकान्त राउतले गरे । शिलान्यसस्थलमै पार्टीको व्यानर राखेको देखिएको छ ।
मधेश प्रदेश सरकारको रु २५ लाखको लागतमा यो भवन बनाउन स्थानीय चिन्टु सिंहको नेतृत्वमा ७ सदस्यीय उपभोक्ता समिति बनाइएको छ । सिंह जनमत पार्टीकै स्थानीय नेता हुन् ।
विद्यालयका प्रधानाध्यापक बिजेन्द्र शर्मा आफूलाई यसबारेमा कुनै पनि जानकारी नदिइएको बताए ।
शिलान्यास कार्यक्रममा सम्बन्धित वडा अध्यक्षलाई जानकारी गराउनुपर्नेमा स्थानीय कुनै पनि जनप्रतिनिधीलाई नबोलाइएको विद्यालय श्रोतले जनाएको छ ।
