राजविराज । लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले आफ्ना नेता कार्यकर्तामाथि लगाइएको मुद्दा खारेज गर्न माग गरेका छन् ।
आफुहरु शान्तिपूर्ण आन्दोलन गर्दा पनि प्रहरीले गोली चलाउने गरेको र त्यसको बचाउ गर्दा समेत राज्यले मुद्दा चलाउने गरेको उनले बताए ।
राजविराजमा आज आयोजित पत्रकार सम्मेलनमा अध्यक्ष ठाकुरले हजारौंलाई मार्ने माओवादीलाई कुनै मुद्दा नचल्ने र शान्तिपूर्ण तरिकाले प्रहरीको गोलीको बचाव गर्दा आफ्ना नेतालाई जन्मकैदको सजाय दिएको उनले बताए ।
राजनीति मुद्दामा आफ्ना प्रदेश सदस्य अभिराम शर्मासहितकालाई मुद्दा फिर्ता चलाइएको भन्दै उनले सो मुद्दा फिर्ता लिन माग गरे । ‘ यस विषयमा हालै प्रधानमन्त्री र गृहमन्त्रीसँग भेट गरि अवगत गराएको छु’ उनले भने, ‘तत्काल सकारात्मक जवाफ आएको छ ।’
अध्यक्ष ठाकुरले जनतालाई अधिकार सम्पन्न बनाउन र स्वायत्तताका लागि मोर्चा निर्माण गरेको बताए ।
उनले रुपन्देहीको उप निर्वाचनपछि संघीय र मधेश सरकारमा परिवर्तन हुने बताए ।
जनसंख्याको आधारमा बजेट दिनुपर्नेमा सरकारले मधेशसँग बेइमानी गरिरहेको बताए ।
‘मधेससँग राजस्व अत्यधिक उठाउछ तर २० प्रतिशत पनि दिदैन’ उनलेे भने, ‘कम्तीमा ३५ प्रतिशात दिए केही काम हुन्छ ।’
